Կիրակի օրը Ադրբեջանի իրավապահ մարմինները անվտանգության աննախադեպ միջոցառումներ են իրականացրել Սումգայիթ քաղաքում՝ նպատակ ունենալով կանխել հնարավոր բողոքի ցույցը. նման ցույցի կոչեր արվում էին սոցցանցերով՝ հուլիս 10-ին Գյանջայում տեղի ունեցած բողոքի ցույցերից հետո:
Ոստիկանությունն ու հատուկ ստորաբաժանումներն ամբողջությամբ փակել են դեպի տեղական ինքնակառավարման շենք տանող բոլոր ճանապարհները: Հրապարակին հարող տարածքներում նկատվել են զրահատեխնիկայի միավորներ:
Սրճարանների և խանութների սեփականատերերին իշխանությունները կարգադրել են փակել այդ հաստատությունները՝ խուսափելով մարդկանց կուտակումներից:
Ընդ որում, ոստիկանությունը թույլ չի տվել քաղաքացիներին իրավիճակը և փողոցներում երևացող զրահատեխնիկան նկարել բջջային հեռախոսներով:
Հաղորդվում է, որ քաղաքում անցկացվել են նաև ստուգումներ, որոնք նպատակ ունեին հայտնաբերել և ձերբակալել «կրոնական ծայրահեղականներին» և «նրանց աջակցող ծայրահեղ ընդդիմության ներկայացուցիչներին»: Ըստ իրավապահների՝ ձերբակալվել է 18 մարդ:
Հիշեցնենք, հուլիսի 10-ին Գյանջայում քաղաքային վարչության շենքի դիմաց տեղի ունեցած բախումներում սպանվել է ոստիկանության երկու սպա: Բողոքի ցույցերն ուղղված էին քաղաքապետ Էլմար Վելիևի դեմ, որի նկատմամբ հուլիսի 3-ին մահափորձ էր իրականացվել:
Ըստ իշխանությունների՝ անկարգությունները հրահրվել էին կրոնական ծայրահեղականների կողմից:
Դրանից հետո սոցցանցերում կասկածելի էջերով սկսեցին կոչեր տարածվել՝ նմանատիպ գործողություններ կրկնել Սումգայիթում:
Պատրաստեց՝ Վիկտորյա ԱՆԴՐԵԱՍՅԱՆԸ
