Այս տարի դիմորդները ընդունելության քննություններին մասնակցել են ժամանակակից տեխնիկական լուծումներով՝ հատուկ ականջակալներ, հեռախոսներ, «խելացի» ժամացույցներ ու այլ՝ համացանցում հայտնի միջոցներ: Այս մասին այսօր «Արմենպրես»-ի մամուլի սրահում լրագրողների հետ հանդիպմանը տեղեկացրեց Գնահատման և թեստավորման կենտրոնի տնօրենի ժամանակավոր պաշտոնակատար Արմեն Փաշայանը: Նա նշեց, որ որոշ դիմորդների ստիպված հեռացրել են քննություններից՝ նման մեթոդների դիմելու համար:
Գնահատման և թեստավորման կենտրոնի տնօրենի տեղակալ Կարո Նասիբյանն էլ անկեղծացավ. «Գիտեք, ասում են՝ հեռախոսը ծնողի մոտ են թողել, բայց այնպիսի տեղերում են պահում, որ ամոթ էլ է ասես: Մտքներովդ էլ չի անցնի, որ նման տեղերում կարելի է հեռախոս պահել: Ընդ որում, երեք հեռախոսով են գալիս, որպեսի առաջին երկուսը հայտնաբերվելուց հետո կարողանան երրորդից օգտվել»: Կարո Նասիբյանը նշեց, որ տարեցտարի մեկ այլ՝ տհաճ երեւույթի էլ են ականատես լինում: Պարզվում է՝ քննությունների մեկնարկից մոտ մեկ ու կես ժամ անց, երբ առավել ընդունակ դիմորդներն ավարտում են եւ դուրս գալիս, ներսում մնացածների ծնողներն իրենց երեխաներին հեռախոսով ուղարկում են դուրս եկածների ձեւաթղթերի պատճեների լուսանկարները:
«Ստացվում է, որ մեկի հեռախոսում միանգամից մի քանի լուսանկար ենք հայտնաբերում՝ տարբեր պատասխաններով»,-նկատեց Նասիբյանը: Նա նաեւ ընդգծեց, որ առաջարկելու են հաջորդ քննությունների ժամանակ մետաղորսիչներ կիրառել, որպեսզի դիմորդները չկարողանան ժամանակակից տեխնիկական միջոցները քննասենյակներ մտցնել: Եղել է նաեւ, որ դիմորդի մոտ հեռախոս է հայտնաբերվել, հանձնաժողովականը խնդրել է հանձնել այն, ինչի ի պատասխան լսել է. «Երկրորդն էլ տա՞մ»:
Լուիզա ՍՈՒՔԻԱՍՅԱՆ
