«Ժառանգություն» կուսակցության առաջնորդ Րաֆֆի Հովհաննիսյանը ողջունում է ՀՀ վարչապետ Նիկոլ Փաշինյանի այն հայտարարությունը, որ Արցախը պետք է վերադառնա բանակցային սեղանի շուրջը: «Այսպես կոչված «Մադրիդյան դրույթները» (բանակցային սեղանին առկա փոխզիջումային փաստաթուղթը) պետք է վերանայվեն, որովհետեւ Արցախն ունի իր տարածքային ամբողջականությունը: Ցանկացած փաստ, որը հարցականի տակ է դնում դա եւ Արցախի ինքնիշխանությունը, գոյություն չի կարող ունենալ բանակցային սեղանին»,-«Հայացք» մամուլի ակումբում լրագրողների հետ հանդիպմանն այսօր հայտարարեց նա:
Րաֆֆի Հովհաննիսյանի խոսքով՝ դեռ պետք է ճշտել, թե ՀՀ նոր իշխանությունն ի՞նչ փաստաթղթերի շուրջ է պատրաստվում բանակցել Արցախի հարցում:
Հարցին, թե ինչպիսի բանակցող է Նիկոլ Փաշինյանը, եւ ինչպիսին էր ՀՀ երրորդ նախագահ Սերժ Սարգսյանը, Րաֆֆի Հովհաննիսյանը պատասխանեց. «Մեկը բանակցել է առանց ժողովրդի վստահության եւ քվեի՝ զույգ «ընտրագողություններից» հետո գալով իշխանության, երկրորդը՝ ժողովրդի քաղաքացիական ակտիվության միջոցով բանակցում է վստահության քվեով»:
Լուիզա ՍՈՒՔԻԱՍՅԱՆ
