«Ոչ լավ, ոչ վատ ոչինչ չեղավ: Լավը գուցե այն էր, որ հանդիպեցինք-քննարկեցինք»,- Բրյուսելում կայացած ՆԱՏՕ-ի գագաթաժողովի արդյունքները Հայաստանի համար այսպես է գնահատում լեզվաբան Նարինե Դիլբարյանը: Այսօր Միջազգային եւ անվտանգության հարցերի հայկական ինստիտուտում կազմակերպված քննարկման ժամանակ, Նարինե Դիլբարյանն առաջարկեց`ՆԱՏՕ-ի գագաթաժողովը ընդունել եւ ընկալել իբրեւ մեր արտաքին քաղաքական առաջնահերթությունները ճշգրտելու եւ հստակեցնելու առաջարկ, թե ՌԴ-ի, թե ՆԱՏՕ-ի կողմից: Ասում է, որ բավական բարդ իրավիճակում ենք եւ սա պետք է հստակ գիտակցել:
ՆԱՏՕ-ն այս տարածաշրջանում գնում է ուժեղացման, տարածաշրջանում նոր դերակատարում է ստանձնել եւ բանախոսի կարծիքով, մինչ այս ՌԴ-ն ամեն ինչ արել էր, որպեսզի ՆԱՏՕ-ն այսպիսի քայլեր ձեռնարկի`մեծացնի իր ռազմական հնարավորությունները եւ այլն: «Գագաթնաժողովի կարեւորագույն ձեռքբերումներից մեկը ՆԱՏՕ-ի անդամ երկրների միակամությունն էր եւ կտրուկ դրսեւորումը Ռուսաստանի հանդեպ: Ինձ մտահոգում է այդ հայեցակարգը: ՆԱՏՕ-ն հստակեցրեց, որ իրենք ամեն գնով կանխելու են Ռուսաստանի քայլերը»,- ասաց բանախոսը` այս ամենի համատեքստում մտահոգություններ հայտնելով Հայաստանի արտաքին քաղաքական ուղեգծի առնչությամբ այս երկու խոշոր բեւեռների նկատմամբ:
Հայաստանի նոր կառավարության արտաքին քաղաքական մոտեցումները Նարինե Դիլբարյանը չափազանց ընդհանրական է համարում: Ասում է` եթե նախորդ իշխանությունների դեպքում ոգեւորվում էինք «եւ-եւ-ի» քաղաքականության համար, բայց ՆԱՏՕ-ի վերջին գագաթաժողովը ցույց է տալիս, որ Հայաստանի «եւ-եւ-ի» դաշտը գնալով սահմանափակվում է: Հարցնում է` այս իրավիճակում ի՞նչ պետք է հակադրենք ՆԱՏՕ-ին եւ ՌԴ-ին: Նկատում է`Ադրբեջանն ունի Թուրքիայի նման դաշնակից ՆԱՏՕ-ում. «Իսկ մենք ո՞ւմ ունենք»: Անընդհատ մատնանշվում է ՌԴ-ն, իբրեւ ՀՀ-ի դաշնակից, բայց ինքը համամիտ չէ:
Ամփոփում է. «Այս գագաթաժողովը մեր արտաքին քաղաքականության համար մարտահրավեր էր: Պետք է ճշգրտել, թե ո՞ւր եւ ինչպե՞ս ենք գնում»:
Նա բնավ պատահական չի համարում այս օրերին Մոդեստ Կոլերովի հարցազրույցը, դրանում հնչած հարցերը`եթե ոչինչ չէր փոխվելու, ինչո՞ւ Սերժ Սարգսյանին փոխեցիք:
«ՆԱՏՕ-ն էլ չգիտի` ո՞ւր ենք գնում, պուտինյան ՌԴ-ի համար էլ է անհասկանալի: Գուցե ժամանակ է պետք, բայց այդ ժամանակը վտանգավոր է: ՀՀ-ն նոր օրակարգ պետք է ունենա եւ հստակ լինի, թե ո՞ր մարմիններն են դրանով զբաղվում»,- ասաց բանախոսը` հավելելով, որ երեկ, օդանավակայանում Նիկոլ Փաշինյանի տված հարցազրույցում ինքը զգացել է, որ Նիկոլ Փաշինյանն արդեն մի փոքր վիրավորված էր: Բայց կարծում է, որ նախ ճանապարհը պետք է հստակեցնել, նոր պերֆերանցիաներ ստանալ եւ հստակ պատասխաններ տալ թե ՌԴ-ից, թե ՆԱՏՕ-ից հնչող հարցադրումներին:
Նելլի ԳՐԻԳՈՐՅԱՆ
«Նիկոլ Փաշինյանն արդեն մի փոքր վիրավորված էր» !!
արդէն ?! դեռ կեցի՜ր, ջանս…
Յարգելի ու Պատուարժան Վարչապետը լաւ կ’ընէ մի քիչ մորթը կարծրացնելու…
Ինք ուզեց այս պաշտօնը, ստացաւ, շնորհաւոր լինի: Սակայն դա անշուշտ նոյնքան հաճելի չի լինելու որքան խանդավառ փողոցներում, հմայուած երկրպագուներով շրջապատուած, Աշխարհը վերստեղծելը: