Բեռնափոխադրող «Նորֆոլկ քոնսալթինգ» ընկերությունը մինչեւ ամսվա վերջ ամբողջությամբ կլուծարվի: Այս մասին այսօր լրագրողների հետ հանդիպման ժամանակ ասաց ՊԵԿ նախագահ Դավիթ Անանյանը:
Այս ընկերությունում ԱԱԾ-ն հայտնաբերել է խոշոր չափերի չարաշահումներ. մի քանի միլիոն դոլար հարկ պետական բյուջե չի վճարել: Քրեական գործ էր հարուցվել, ընկերության տնօրեն Արմեն Ունանյանը մի մասը վերադարձրել է պետական բյուջե:
ՊԵԿ նախագահն ասաց, որ այս ընկերության նկատմամբ հարուցված քրեական գործն ամենայն հավանականությամբ կկարճվի, եթե պատճառված վնասն ամբողջովին վերականգնվի, ժամկետը մինչեւ հուլիսի 20-ն է. «Եթե քրեական գործը կարճվի, «Նորֆոլկ քոնսալթինգի. հետ կապ ունեցող անձանց ոչինչ չի սպառնում»:
Ավելի վաղ Aravot.am-ը գրել էր, որ «Նորֆոլկ քոնսալթինգը» փոխարինվելու է պետական մասնակցությամբ նորաստեղծ ընկերությունով, իսկ մինչ այդ, «Նորֆոլկ քոնսալթինգն» իրականացնում է նույն գործառույթը, ինչն իրականացրել է, բայց ՊԵԿ-ի ներքին անվտանգության աշխատակիցների շուրջօրյա վերահսկողության ներքո:
Այսօր անդրադառնալով «Նորֆոլկ քոնսալթինգին» փոխարինող ընկերությանը, Անանյանն ասաց. «Մենք ունենք առաջարկներ կառավարությանը, «Նորֆոլկին» փոխարինելու է պետական մասնակցությամբ բաժնետիրական ընկերություն: Բայց ինքը ոչ թե ամբողջությամբ կրկնօրինակելու է այն գործողությունները, որոնք «Նորֆոլկ Քոնսալթինգն» է իրականացնում, այլ պետք է հանդիսանա մաքսային միջնորդային ծառայություններ իրականացնող: Այսօր մանր ու միջին ձեռներեցությամբ զբաղվողները պատրաստ չեն ամբողջությամբ իրենք պատասխանատվություն կրել, գալ ու ինքնուրույն մաքսային ձեւակերպումներ իրականացնել: Մենք պետք է աստիճանաբար իրականացնենք այնպիսի մշակույթ, որ բոլոր ապրանքները մաքսազերծվեն ըստ տեսականու»:
Նելլի ԲԱԲԱՅԱՆ
