«Ժառանգություն» կուսակցությունը ողջունում է նոր կառավարության գործունեությունը եւ սատարում նրան: «Հույս ունենք, որ սպասվելիք արտահերթ խորհրդարանական ընտրություններով 25 տարում առաջին անգամ մեր ժողովուրդը կունենա վստահելի կառավարություն»,-«Հայացք» մամուլի ակումբում այսօր լրագրողների հետ հանդիպմանը հայտարարեց «Ժառանգություն» կուսակցության առաջնորդ Րաֆֆի Հովհաննիսյանը:
Նա կարծում է, որ ժողովրդական հեղափոխության արդյունքները քաղաքականապես արձանագրելու համար պետք է մեկ միասնական ցուցակով հանդես գալ ընտրություններում:
«Քաղաքացիական պայմանագիրը» պետք է ծանրութեթեւ անի՝ եթե ուզում են կուսակցականացված մոտեցում, մենք կողմ ենք մեր կուսակցական դրոշները վայր դնելուն եւ միասնական ցուցակով մասնակցելուն: Կարծում եմ՝ դա անհրաժեշտ է, մենք կողջունենք դա: Եթե ոչ, կորոշենք՝ առանձի՞ն մասնակցել, թե՞ այլ ուժերի հետ»,-հայտարարեց Րաֆֆի Հովհաննիսյանը եւ չհստակեցրեց՝ ինքը կլինի՞ պատգամավորի թեկնածու, թե՞ ոչ:
Լրագրողները հետաքրքրվեցին՝ հնարավո՞ր է «ՕՐՕ» դաշինքը նորից կազմավորվի, եթե Փաշինյանի հետ դաշինք չկազմեն: Հովհաննիսյանը պատասխանեց. «Այդ դաշինքը նախընտրական էր, որը թիրախավորվեց նախորդ իշխանության կողմից: Չեմ կարծում, որ այդ դաշինքը այլեւս գոյություն ունի»:
ՀԱԿ-ի եւ «Ծառուկյան» դաշինքի հետ ընտրություններին մասնակցելու հնարավորության շուրջ էլ Րաֆֆի Հովհաննիսյանն ասաց. «Մենք զորակցել ենք ընդդիմության բոլոր թեկնածուներին վերջին տասնամյակում: Ով պատրաստ է մեծ դաշինքով պայքարել, մենք կսատարենք»:
Լուիզա ՍՈՒՔԻԱՍՅԱՆ
