Քաղաքագետ Աղասի Ենոքյանի կարծիքով, վարչապետ Նիկոլ Փաշինյանը Բրյուսել կատարած այցի ժամանակ երկու կարեւորագույն ուղերձ կարողացավ տեղ հասցնել։ Այս մասին այսօր «Հենարան» ակումբում ասաց քաղաքագետը: «Առաջին ուղերձն այն էր, որ ղարաբաղյան խնդրի կարգավորման հարցում Արեւմուտքը ունի կարեւորագույն դեր։ Մինչեւ հիմա մենք տեսնում էինք, որ միակողմանի`պրոռուսական քաղաքականություն է վարվում, իսկ հիմա խոսվեց այն մասին, որ Արեւմուտքը նույնպես իր դերն ունի»,- ասաց Աղասի Ենոքյանը:
Երկրորդ ուղերձն էլ, ըստ քաղաքագետի, այն էր, որ Արեւմուտքի համար կարեւորվեց Հայաստանի դերը, որպես ժողովրդավարական երկիր: Այս ուղերձում, քաղաքագետը գլխավոր հարցը համարում է այն, որ Արեւմուտքը պետք է աջակցի ժողովրդավարական երկրին, ի հակադրություն Ադրբեջանի, որը տոտալիտար երկիր է:
Առհասարակ, բանախոսի կարծիքով, Նիկոլ Փաշինյանի բրյուսելյան այցը Հայաստանի համար բավականին էական նշանակություն ունեցավ: Նա վստահ է, բրյուսելյան հանդիպումներից հետո Արեւմուտքում Հայաստանի դերն ու նշանակությունը բարձրացել է: Արեւմուտքում, իր կարծիքով, Նիկոլ Փաշինյանով բավական հետաքրքրված են:
Իսկ Նիկոլ Փաշինյանի բարձր լեգիտիմությունը, Աղասի Ենոքյանի կարծիքով, նրան նաեւ ոչ պոպուլյար քայլեր անելու հնարավորություն է տալիս:
Նելլի ԳՐԻԳՈՐՅԱՆ
