Պետական եկամուտների կոմիտեի՝ մի շարք գազալցակայաններում հայտնաբերած խախտումների, մասնավորապես՝ խոշոր ծավալի հարկեր թաքցնելու մասին հայտնաբերած դեպքերի վերաբերյալ այսօր Aravot.am-ը հետաքրքրվեց ՊԵԿ նախագահ Դավիթ Անանյանից, թե ում են պատկանում այդ գազալցակայանները, արդյոք այդ գազալցակայանները պատկանում են ներկա եւ նախկին պաշտոնյաներին: Դավիթ Անանյանը մեր հարցին ի պատասխան ասաց, որ դրանց ցուցակը պատրաստել էր, սակայն մոռացել է բերել այսօրվա ասուլիսին: «Գազպրոմ-Արմենիան» այս առնչությամբ տարածել էր պարզաբանում:
Այնուամենայնիվ, Անանյանը մի քանիսի անունները հիշեց, օրինակ՝ հարկեր են թաքցրել ՊԵԿ նախկին նախագահ Վարդան Հարությունյանին, ԱԺ նախկին պատգամավոր Մհեր Սեդրակյանին պատկանող գազալցակայանները: Անանյանի խոսքերով՝ ամենաքիչ հարկ թաքցնողը եղել է Մհեր Սեդրակյանը՝ 15 մլն դրամ:
Մեր ճշտող հարցին՝ արդյոք նախկին վարչապետ Հովիկ Աբրահամյանին եւ ԱԺ պատգամավոր Գագիկ Ծառուկյանին պատկանող գազալցակայանները կա՞ն այդ ցանկում, Անանյանը պատասխանեց. «Հովիկ Աբրահամյանինը չկար, Գագիկ Ծառուկյանինը կար»:
Նելլի ԲԱԲԱՅԱՆ
