Այս շաբաթ վարչապետ Նիկոլ Փաշինյանը հայտարարեց, որ կոռուպցիայի, չարաշահումների ու ստվերային տնտեսության դեմ պայքարի արդյունքում հուլիսի 1-ի դրությամբ հաշվարկվել և վերականգնվել է 20 միլիարդ 622 միլիոն դրամի վնաս կամ չվճարված հարկ: Սակայն բյուջե փաստացի վերականգնված է 800 միլիոն դրամ: Տնտեսական ցուցանիշներն այս օրերին, չգիտես ինչու, չափվում են թալանված միջոցների վերադարձով, հավանաբար այն պատճառով, որ հանրությունն այս երկու ամսվա ընթացքում տեսնում է միայն ԱԱԾ-ի գործողությունները: Սակայն թալանված միջոցների վերադարձով տնտեսություն չես պահի: Տնտեսական զարգացման ի՞նչ դինամիկա կա, վարչապետը խոստացել էր, որ ներդրումային բում կլինի, դրա միտումները կա՞ն, այս հարցերն ուղղեցինք ԱԺ տնտեսական հարցերի մշտական հանձնաժողովի նախագահ ԽՈՍՐՈՎ ՀԱՐՈՒԹՅՈՒՆՅԱՆԻՆ:
-Օբյեկտիվ գնահատելով իրավիճակը, պետք է ասել, որ եթե ներդրումներ անել ցանկացողներ էլ կան, իրական արդյունքներ այս կարճ ժամանակամիջոցում հազիվ թե երևան,- ասաց պատգամավորը։- Վիճակագրական տվյալներով եթե խոսենք, նման հիմքեր չկան: Նպատակ չունեմ որևէ մեկի հայտարարությունը կասկածի տակ դնելու, չեմ էլ ժխտում, որ Հայաստանի հանդեպ կա լուրջ հետաքրքրվածություն, բայց հետաքրքրվելը մեկ բան է, իրական ներդրումներ անելը՝ լիովին այլ: Ներդրումները, նախ, ժամանակ են պահանջում:
-Տնտեսական զարգացման կոնկրետ ծրագիր կամ դրա տեսլականը այսօր կա՞:
-Կառավարության գործունեության ծրագրի վերաբերյալ իմ վերապահումներն ունեմ: Այդ ծրագրում թեպետ առաջնային էր համարվել երեք ոլորտ, բայց որդեգրած քաղաքականությունը հազիվ թե որևէ օտարերկրյա ներդրողի հետաքրքրությունը կշարժի: Այդ ծրագրային փաստաթուղթը չէր կարող որևէ ներդրողի համար դառնալ հիմք:
Հաջորդ էական խնդիրը. արտգործնախարարությունից կրճատվեց տնտեսական դիվանագիտության սեկտորը: Պարզվեց, որ արտգործնախարարությունն այդ ոլորտի հետ ընդհանրապես կապ չունի, հետևաբար ուզում եմ հասկանալ` օտարերկրյա ներդրողը ո՞ր խողովակներով պետք է հետաքրքրվի ու հասկանա, թե ինչ ենք ուզում անել:
Ո՞վ է ասել, որ աշխարհը Հայաստանով է ապրում, իսկ երկրագունդը Հայաստանի շուրջն է պտտվում: Գուցե հիմա Հայաստանի նկատմամբ հետաքրքրությունն ավելի մեծ է, քան նախկինում, բայց դա պայմանավորված չէ տնտեսական նոր հնարավորություններով, այլ քաղաքակիրթ իշխանափոխությամբ, հանրային կյանքի ժողովրդավարացմամբ: Ընդամենը այդքանը:
Տնտեսական քաղաքականությունը, ներդրումներ բերելը կոնկրետ աշխատանք են, պոտենցիալ ներդրողի հետ կոնկրետ մարդ պետք է աշխատի: Ես նման աշխատանք չեմ տեսնում:
Զրույցը՝ Ռուզան ԽԱՉԱՏՐՅԱՆԻ
Հարցազրույցն ամբողջությամբ՝ «Իրատես» թերթի այսօրվա համարում
