ՀՀ Վարչական դատարանի դատավոր Ս. Հովակիմյանի այսօրվա որոշմամբ՝ ՀՀ ոստիկանությունը ցուցարար Տարոն Սիրադեղյանին կվճարի 60 հազար դրամ: Տարոն Սիրադեղյանն ավելի վաղ ՀՀ Ոստիկանությունից պատճառված վնասի փոխհատուցման պահանջով հայց էր ներկայացրել դատարանին: Նա դեռեւս 2014 թ. հունիսի 23-ին մասնակցել է ՀՀ Հանրային ծառայությունները կարգավորող հանձնաժողովի վարչական շենքի մոտ կազմակերպված հավաքին և ենթարկվել վարչական ձերբակալման, իսկ 2017 թ.-ին Վերաքննիչ վարչական դատարանը ոչ իրավաչափ էր ճանաչել ցույցի ընթացքում Տարոն Սիրադեղյանի նկատմամբ ոստիկանության գործողությունները և մերժել վերջինիս պատասխանատվության ենթարկելու՝ ՀՀ Ոստիկանության հայցը:
Ցուցարարն էլ վարչական հայցով Ոստիկանությունից պահանջել է ոչ իրավաչափ վարչարարության արդյունքում հասցված ոչ գույքային վնասի փոխհատուցումը՝ 465.000 ՀՀ դրամի չափով:Դատարանը, սակայն, նրա հայցն այսօր մասնակի բավարարեց՝ 60 հազար դրամի չափով:
Տարոն Սիրադեղյանի շահերի պաշտպան, փաստաբան Տաթեւիկ Սիրադեղյանն Aravot.am-ին հայտնեց, որ վարչական դատարանի վճիռը բողոքարկելու համար մեկ ամիս կա, եւ իրենք, ամենայն հավանականությամբ, կբողոքարկեն այն:
Լուիզա ՍՈՒՔԻԱՍՅԱՆ
