Այսօր՝ հուլիսի 12-ին Տավուշի մարզի առաջին ատյանի դատարանում մեկնարկել է Տավուշի մարզի Բերդի տարածաշրջանի սահմանամերձ Վերին Կարմիրաղբյուրի բնակիչ Գեւորգ Լեւոնի Չոբանյանի դատավարությունը: Նրան մեղադրանք է առաջադրվել այն բանի համար, որ 2018թ. մայիսի 1-ին, ժամը 09.00-ի սահմաններում, Ներքին Կարմիրաղբյուր համայնքի դիմաց գտնվող ՀՀ ՊՆ N զորամասի կողմից վերահսկվող մարտական դիրքի տարածքով փորձել է հատել Հայաստանի Հանրապետության պահպանվող պետական սահմանը եւ մուտք գործել Ադրբեջան:
Նրան մեղադրանք է առաջադրվել ՀՀ քրեական օրենսգրքի 34-329 հոդվածի 1-ին մասով («Առանց սահմանված փաստաթղթերի կամ առանց պատշաճ թույլտվության Հայաստանի Հանրապետության պահպանվող պետական սահմանը հատելու փորձը»): Սույն հոդվածը որպես պատիժ նախատեսում է 100-200 հազար դրամի չափով տուգանք կամ առավելագույնը 3 տարի ժամկետով ազատազրկում:
Նախկինում հայտնել ենք, որ 1975թ. ծնված Գ. Չոբանյանը սահմանապահներին ասել է, որ ինքը ցանկացել է ադրբեջանցիներին թուղթ հանձնել, որն ապացուցում է, որ Ղարաբաղը հայկական տարածք է:
Ոսկան ՍԱՐԳՍՅԱՆ
