Խորհրդարանն այսօր երկրորդ ընթերցմամբ`68 կողմ, 1 դեմ, 2 ձեռնպահ ձայների հարաբերակցությամբ ընդունեց «Մի շարք վարչական իրավախախտումների համար կիրառված տուգանքների համաներման մասին» օրենքի նախագիծը: Երեկվանից մինչ այսօր`երկրորդ ընթերցում ընկած հատվածում, մի շարք առաջարկներ են ներկայացվել:
Նախագծում ներառվել է ԱԺ պետական-իրավական եւ մարդու իրավունքների պաշտպանության հարցերի մշտական հանձնաժողովի նախագահ Գեւորգ Կոստանյանի առաջարկը: Ըստ այդմ, համաներումը կտարածվի այն անձանց նկատմամբ, ովքեր վճարել են տուգանքները. այդ անձինք համաներման ակտի ընդունման պահից կհամարվեն խախտում չկատարած: «Այսինքն, այն ռեժիմը, որ մեկ տարում կրկին խախտում է անում, եւ այդ խախտման կրկնությունը ծանրացնող հանգամանքներով է հաշվվում. մենք այս ակտով վերացնում ենք ոչ միայն նրանց համար, ովքեր տուգանքը չեն վճարել եւ ազատվում են, այլ նաեւ այն անձանց համար, ովքեր տուգանքը վճարել են»,- ներկայացրեց ՀՀ արդարադատության փոխնախարար Արթուր Հովհաննիսյանը: Այս վարորդները համաներման արդյունքում այլևս չեն համարվի խախտում կատարած:
ԱԺ ՀՀԿ եւ «Ծառուկյան» խմբակցությունների մի շարք առաջարկներ, որոնք վերաբերել են բարեխիղճ վարորդների վճարած գումարները վերադարձնելուն, համաներումը մինչեւ 2018 թ. հուլիսի 1-ն ընկած ժամանակահատվածի համար նախատեսելուն, կառավարությունը չի ընդունել:
Բարեխիղճ վարորդների վճարած գումարները վերադարձնել կառավարության մերժողական տրամադրությունը, որը բացատրվում է ֆինանսական միջոցների բացակայությամբ, կրկին արժանացավ ՀՀԿ-ական պատգամավորների քննադատությանը: Հայկ Բաբուխանյանը, հիշեցնենք, առաջարկել էր վաուչերներով հարցը լուծել: Այն եւս մերժվել է:
Խոսրով Հարությունյանն էլ առաջարկեց`համաներման փոխարեն կիրառել պարտքի ներում տերմինը եւ ազատվել գլխացավանքից: Դա էլ է անտեսվել:
Նախագծին միակ դեմ քվեարկող պատգամավորը ՀՀԿ-ական Միհրան Պողոսյանն էր: Նա մնում է իր կարծիքին`պետք է հավասարություն դնել տուգանքները վճարած եւ չվճարած վարորդների միջեւ: Այդ հարցը, ըստ նրա, կարելի է լուծել հատկացված 13,7 մլրդ դրամը օգտագործելով երկուսի համար էլ. «Սա բարեխիղճ վարորդների նկատմամբ ոչ համարժեք, ոչ ճիշտ մոտեցում է»:
Ընդունված նախագծով, համաներումը չի տարածվի ոստիկանի կարգադրությանը դիտավորյալ չենթարկված քաղաքացիների վրա: Այսպիսով, ոչ բարեխիղճ վարորդներին կներվեն 2012-ից մինչեւ 2017 թվականի դեկտեմբերի 31-ն արձանագրված իրավախախտումները: Ընդհանուր գումարը կազմում է 13,7 մլրդ դրամ:
Նախագիծը տարածվում է տեսանկարահանված ու լուսանկարահանված 150 000 և ճանապարհապարեկային ոստիկանության կողմից արձանագրված 700 000 վարչական իրավախախտումների վրա:
Նելլի ԳՐԻԳՈՐՅԱՆ
