2018 թվականի վերջին 5 ամիսների ընթացքում Հայաստանում ընտանեկան բռնության 289 դեպք է արձանագրվել, որից 35-ով հարուցվել է քրեական գործ: Բռնության 174 դեպքերը ամուսնու կողմից կնոջ նկատմամբ են եղել, 9 դեպքերը՝ կնոջ կողմից ամուսնու նկատմամբ, 26 դեպք՝ ծնողի կողմից զավակի և զավակի կողմից՝ ծնողին՝ 31 դեպք: Այս վիճակագրությունն այսօր խորհրդարանում ներկայացրեց «Ծառուկյան» խմբակցության պատգամավոր Նաիրա Զոհրաբյանը`«ՀՀ քաղաքացիական դատավարության օրենսգրքում լրացումներ կատարելու մասին» նախագծի երկրորդ ընթերցմամբ քննարկման ժամանակ: Այսպիսով պատգամավորը կառավարության ուշադրությունն է հրավիրում բռնության ենթարկված անձանց աջակցության կենտրոնների խնդրի վրա: Դրանք պետք է ստեղծվեն դեկտեմբեր ամսից: Ասում է`հստակ պայմանավորվածություններ պետք է լինեն:
Նաիրա Զոհրաբյանը խնդրահարույց է համարում այն դրույթը, որ աջակցության կենտրոնները կարող են դիմել դատարան, իսկ դրա համար պետք է բռնության ենթարկված անձի դիմումը: «Մենք շատ լավ գիտենք, որ շատ դեպքերում բռնության ենթարկված անձի վրա դատարանում կրկնակի ճնշում է կատարվում՝ դիմում չներկայացնելու համար»,-ասաց նա`հավելելով, որ ընտանիքներում բռնության դեպքերն իսկապես շատ են եւ դա պետք չէ մեր մենթալիտետով արդարացնել:
«Խնդրում եմ կառավարության ներկայացուցիչներին՝ ոչ թե օրենքը ընդունել եւ առաջ անցնել, այլ ակտիվ գործնական քայլեր անել»,-ասաց նա:
Նելլի ԳՐԻԳՈՐՅԱՆ
