Ընթացիկ զորակոչի ընթացքում զինակոչիկների բողոքների քննությամբ զբաղվող՝ Պաշտպանության նախարարին կից ստեղծված հանձնաժողովում այսօր առողջական խնդիրներին առնչվող հերթական դիմում-բողոքները քննվեցին:
Զինակոչիկի մայր Լիանա Հարությունյանը գրել էր, որ որդու՝ Զավեն Կիրակոսյանի մոտ ախտորոշված է կրծքավանդակի դեֆորմացիա, սրտի անկանոն աշխատանք, մինչդեռ նա ծառայության համար ճանաչվել է պիտանի՝ սահմանափակմամբ: Ծնողը համաձայն չէ դրա հետ, քանի որ զինակոչիկը նաեւ վահանաձեւ գեղձի ֆունկցիայի խանգարում ունի: «Հետազոտվել է «Արմենիա» հանրապետական բժշկական կենտրոնում, որտեղ հետազոտության պատասխանն «անհետացել» է: Ասացինք՝ ո՞ւր է փաստաթուղթը, բայց չտվեցին, ասացին, որ խնդիր չկա, որ որդիս պիտանի է ծառայության համար»,-հանձնաժողովի անդամներին հայտնեց զինակոչիկի մայրը:
Լիանա Հարությունյանը վստահեցրեց, որ որդին չի խուսափում ծառայությունից, բայց իրենց անհանգստացնում է վահանաձեւ գեղձի խնդիրը: Ապա մայրը դժգոհեց, որ որոշ այլ ԲԿ-ներում, օրինակ՝ «Էրեբունի»-ում, հրաժարվել են տղային հետազոտել՝ պատճառաբանելով, թե զինակոչիկ է:
Հանձնաժողովի նախագահ, Պաշտպանության նախարարի խորհրդական Գեղամ Հարությունյանը խորհուրդ տվեց՝ եթե նման դեպքերի եք հանդիպում, պարտադիր դիմեք Առողջապահության նախարարությանը. «Մենք ինքներս նախարարությանը տեղյակ ենք պահել, որ ուշադիր լինեն նման ահազանգերի հանդեպ»:
Ուսումնասիրելով ծնողի ներկայացրած բժշկական փաստաթղթերը՝ հանձնաժողովի անդամները որոշեցին դիմել կենտրոնական բժշկական հանձնաժողովին, որպեսզի Զավեն Կիրակոսյանի համար կատարվի վահանաձեւ գեղձի «ասեղային բիոպսիա» հետազոտություն` հանգույցի բնույթը որոշելու համար:
Լուիզա ՍՈՒՔԻԱՍՅԱՆ
