Գյանջայում անկարգություններ հրահրելու փորձը և երկրի կայունության խախտումը վկայում է, որ կան արտաքին ուժեր, որոնց ձեռնտու չէ Ադրբեջանի զարգացումը: Այս մասին հայտարարել է Ադրբեջանի ԱԳՆ պաշտոնական ներկայացուցիչ Հիքմեթ Հաջիևը՝ մեկնաբանելով երեկ Գյանջայում տեղի ունեցած բողոքի ալիքը, որի հետևանքով զոհվել էր երկու ոստիկան:
«Գյանջայի իրադարձությունները ցույց տվեցին, որ Ադրբեջանի զարգացումն անհանգստացնում է ոչ միայն Հայաստանին, այլև որոշ այլ արտաքին ուժերի»,- ասել է Հաջիևն այսօր տեղի ունեցած ճեպազրույցում:
Հաջիևը նշել է, որ այն դեպքում, երբ «Ադրբեջանը գտնվում է պատերազմական պայմաններում, ոստիկանության սպայի սպանությունն ազգային դավաճանություն է»:
Հիշեցնենք, Գյանջա քաղաքում հուլիսի 10-ի երեկոյան բողոքի ակցիայի ժամանակ ցուցարարները սպանել են երկու ոստիկանի:
Պատրաստեց Վիկտորիա Անդրեասյանը
