ԱԺ արտաքին հարաբերությունների հարցերի մշտական հանձնաժողովի նախագահ Արմեն Աշոտյանը նախօրեին անհանգստություն էր հայտնել, որ ՀՀ -ԵՄ համաձայնագրի կիրարկումն ապահովելու նպատակով ՀՀ վարչապետի որոշմամբ ստեղծված միջգերատեսչական հանձնաժողովում խորհրդարանից ներգրավված անձ չկա։
«Հուսամ, ստեղծված վիճակը ոչ թե քաղաքական որոշման, այլ նախագիծը մշակող մարդկանց անփորձության և անուշադրության հետևանք է: Եթե այդպես է, ապա այն շտկելի է, եթե ոչ՝ ապա որդեգրված գործելաոճը միայն խաթարելու է արտաքին դաշտում միասնական գործելու կարևորությունը և ջլատելու է ներպետական ներուժը արտաքին քաղաքականության ասպարեզում»,- գրել էր Արմեն Աշոտյանը:
Ավելի ուշ, ՀՀ վարչապետ Նիկոլ Փաշինյանի մամուլի խոսնակ Արման Եղոյանը լրատվամիջոցներին տված իր պարզաբանումներում ասել էր, որ Նիկոլ Փաշինյանի հանձնարարությամբ հանձնաժողովում ԱԺ-ից եւս ներկայացուցիչ կընդգրկվի. «Ինձ թվում է՝ լինելու է ԱԺ արտաքին հարաբերությունների հարցերի մշտական հանձնաժողովից։ Կարծում եմ՝ կլինի հենց Արմեն Աշոտյանը։ Սկզբունքն այն է, որ ԱԺ-ից եւս ներկայացուցիչ լինի, ներկայացուցիչների քանակն էական չէ»:
Այսօր Aravot.am-ի հարցին ի պատասխան, Արմեն Աշոտյանն ասաց, որ ինքը դեռ որոշման փոփոխությունը չի տեսել:
Նելլի ԳՐԻԳՈՐՅԱՆ
