Այսօր ԱԺ արտահերթ նիստում արդարադատության նախարար Արտակ Զեյնալյանը ներկայացրեց «ՀՀ քրեակատարողական օրենսգրքում փոփոխություն կատարելու մասին» իր նախագիծը, որով առաջարկվում է դատապարտյալների համար հիմնական իրավունք հանդիսացող ընտանիքի եւ արտաքին աշխարհի հետ կապի իրավունքը ապահովել եւ ներկայումս առկա տեսակցությունների՝ կարճատեւ եւ երկարատեւ հանդիպումների ժամկետը կրկնապատկել:
Առանձնապես ծանր հանցանքների համար որոշակի ժամկետով դատապարտման կամ ցմահ դատապարտված անձանց համար ներկայումս տրվում է տարվա ընթացքում 3 կարճատեւ եւ 1 երկարատեւ հանդիպում: Զեյնալյանի խոսքով՝ «Նման պայմաններում խաթարվում է նշված խմբի մարդկանց կապն ընտանիքի եւ արտաքին աշխարհի հետ, ինչը կարող է ուղեկցվել հոգեբանական եւ բազմաթիվ այլ խնդիրներով՝ ոտնահարելով դատապարտյալների՝ ընտանիքի անդամների երեխաների, ծնողների հետ շփման իրավունքը եւ բարձրացնելով կրկնահանցագործությունների ռիսկը»:
Հիմա կառավարությունն առաջարկում է կրկնապատկել տեսակցությունների ժամկետը եւ այդ դատապարտյալներին տրամադրել առնվազն 6 կարճատեւ եւ 2 երկարատեւ հանդիպում։
ՀՀԿ պատգամավոր Կորյուն Նահապետյանը ողջունեց, որ տեսակցությունների ժամանակը ավելացնում են:
«Ծառուկյան» խմբակցության պատգամավոր Սերգեյ Բագրատյանը հարցրեց՝ միգուցե հնարավորություն ստեղծվի ավելի հաճախ շփման շանս տալ դատապարտյալներին, որոնք ունեն ընտանիքի ջերմության կարիքը, մեր պետությունը չպետք է ափսոսի: Նախարարը պատասխանեց, որ ընդունում են՝ դա հանցագործությունների կանխարգելման միջոց է նաեւ, բայց այս պահին կարող են միայն կրկնապատկել հանդիպումների քանակը, առաջիկայում հնարավոր է տեսակցությունների քանակն ավելացնել, նաեւ որակը բարելավել:
ԱԺ փոխնախագահ Միքայել Մելքումյանը հարցրեց՝ կրկնապատկում եք տեսակցությունը, ի՞նչն է խանգարում քառապատկել: Զեյնալյանը պատասխանեց, որ այն դատապարտյալների քանակը, որոնք կարող են տեսակցել, շենքային պայմանները, անվտանգության երաշխավորումն ապահովելը, քրեակատարողականի ծառայողների քանակը. «Այս պահին հնարավորություն ունենք միայն կրկնապատկել այդ թիվը, բայց ցանկություն ունենք ավելացնել»:
Հռիփսիմե ՋԵԲԵՋՅԱՆ
