Մանվել Գրիգորյանի փաստաբան Արսեն Մկրտչյանը նշեց, որ Մանվել Գրիգորյանը շարունակում է չընդունել իրեն առաջադրված մեղադրանքը։ «Ինչպես կարող է մարդ ընդունի մի բան, որը որ չկա։ Անգամ տուժող չունենք մինչև հիմա այս գործով։ Մարդը մեղադրվում է յուրացման մեջ, բայց չգիտենք՝ ումից է իրականացվել այդ յուրացումը։ Նորմալ պայմաններում չէր կարող նման մեղադրանք առաջադրվել։ Սա զարհուրելի դեպք է, երբ մեղադրանքը պայմանավորված է բացառապես չգիտեմ ինչով»,- ասաց գեներալ Մանվելի պաշտպանը։
Իրավապաշտպան Վարդան Հարությունյանը պնդում է, եթե իրոք գեներալ Մանվել Գրիգորյանի վիճակը ծանր է և նրա հիվանդությունը համատեղելի չէ կալանավորման հետ, ապա, անկասկած, նրա խափանման միջոցը պետք է մեղմացվի։ «Այսօր մենք ամեն օր ականատես ենք լինում խափանման միջոցի մեղմացման դեպքերի՝ լուրջ ու ծանր հանցագործությունների դեպքերով, իսկ ի՞նչը պետք է խանգարի, կամ ինչո՞ւ չպետք է այս մարդու դեպքում նույնպես մարդասիրական մոտեցում դրսևորվի, հատկապես որ հիվանդությունները մտացածին չեն»,- ասաց Հարությունյանը։
Ի դեպ, Արսեն Մկրտչյանը, ի պատասխան հարցման, նշեց, որ Գրիգորյանին փոխանցել է Ռոբերտ Քոչարյանի երեկվա հարցազրույցում նրան վերաբերող հատվածը, որին Գրիգորյանը պատասխանել է՝ թող մնա, հետո կկարդամ։
Սոնա ՀԱՐՈՒԹՅՈՒՆՅԱՆ
Հոդվածն ամբողջությամբ՝ «Ժամանակ» օրաթերթի այսօրվա համարում
