Հունիսի վերջին ցանցացատկի Հայաստանի բաց առաջնությանը որպես հյուր ներկա էր մեր հայրենակից, սպորտի վաստակավոր վարպետ, աշխարհի չեմպիոն, Եվրոպայի եռակի չեմպիոն, Աշխարհի կրկնակի գավաթակիր եւ Ռուսաստանի բազմակի չեմպիոն Սերգեյ Ազարյանը: Նա ծնվել եւ բնակվում է Վորոնեժում:
«Առավոտը» այդ օրերին հարցազրույց էր ունեցել նրա հետ:
– Ազարյան ազգանունը քաջ հայտնի է սպորտում: Ալբերտ Ազարյանի հետ ազգակցական կապ կա՞:
– Ոչ: Պարզապես ազգանվանակից ենք: Ծնողներս Կիրովաբադից են:
– Մասսայականության առումով ցանցացատկը սպորտային մարմնամարզության կամ ակրոբատիկայի հետ չես համեմատի: Ինչպե՞ս եղավ, որ հենց ցանցացատկն ընտրեցիր:
– Հիմա ես 28 տարեկան եմ: Մինչեւ 12 տարեկանը Վորոնեժում մեր տան մոտ գտնվող մարզադպրոցում զբաղվում էի ակրոբատիկայով: 2003 թվականին ցանցացատկը մուտք գործեց մեր մարզադահլիճ: Ինձ գրավեց թռչելու զգացումը, այն, որ ցանցացատկորդները ճախրում են օդում: Եվ ես 13 տարեկանում որոշեցի փոխել մարզաձեւս:
– Հայաստանում առաջի՞ն անգամ ես:
– Այո: Ինձ որպես հյուր հրավիրեց Հայաստանի ֆեդերացիան: Շատ շնորհակալ եմ, որ ինձ իմ պատմական հայրենիքում գտնվելու հնարավորություն ստեղծվեց: Դեռ շատ բան չեմ տեսել, բայց անպայման ժամանակ կգտնեմ Հայաստանում շրջելու, պատմամշակութային վայրերում լինելու համար:
– Իսկ քո Հայաստանում ցանցացատկի վիճակին ծանոթանալ հասցրե՞լ ես:
– Հաճելի է տեսնել, որ Հայաստանում մեծ գործ է արվում ընդհանրապես մանկապատանեկան սպորտը զարգացնելու համար: Իմ մարզաձեւը այստեղ նոր է զարգանում, ու դրանում ֆեդերացիայի նախագահ Դավիթ Ֆահրադյանի դերը մեծ է: Ինձ ուրախացնում է, որ երեխաները հաճույքով են մարզվում այս գեղեցիկ մարզաձեւով:
– Դու ինչ-որ բանով կարո՞ղ ես օգնել:
– Հիմա ես վարպետության դաս կանցկացնեմ երեխաների հետ, նոր տարրեր կցուցադրեմ նրանց, ինչը, կարծում եմ, արդեն պարապողներին կօգնի բարձրացնել արդյունքները, կնպաստի, որպեսզի նոր երեխաներ սկսեն հաճախել ցանցացատկի մարզումներին: Իսկ մոտ ապագայում դժվար թե կարողանամ ավելին անել, քանի որ ինքս առայժմ պրոֆեսիոնալ մարզիկ եմ ու իմ առջեւ դեռ մարզական նպատակներ ունեմ դրած: Երեւանից մեկնելու եմ Մոսկվա՝ հավաքի, որից հետո Շվեյցարիայում մասնակցելու եմ Աշխարհի գավաթի խաղարկությանը: Իսկ այս մրցաշրջանի իմ գլխավոր մեկնարկը տարեվերջին կայանալիք աշխարհի առաջնությունն է, որին անհրաժեշտ է ամենայն լրջությամբ նախապատրաստվել:
– Ցանցացատկը Հայաստանում զարգացնելու համար առաջնային ի՞նչ է անհրաժեշտ անել:
– Առաջին հերթին ցանկություն է հարկավոր եւ կազմակերպված աշխատանք: Հարկավոր է հրավիրել գրագետ մասնագետների, որոնք կօգնեն ոչ միայն մարզիկներին, այլեւ մարզիչներին: Պետք է անել այնպես, որպեսզի մարզիչներն ու մարզիկները մարզաձեւն ընկալեն իր բոլոր նրբություններով: Իհարկե, անհրաժեշտ են նաեւ ֆինանսական՝ սկզբի համար թեկուզ ոչ մեծ ներդրումներ, լավ մարզադահլիճներ եւ սարքավորումներ: Իսկ երեխաների ցանկությունը ես տեսնում եմ:
ԱՇՈՏ ՀԱԿՈԲՅԱՆ
«Առավոտ» օրաթերթ
10.07.2018
