19 տարին լրացած եւ հանրակրթական դպրոցում սովորող զինակոչային տարիքի երիտասարդների համար կառավարության որոշումով տարկետում կտրամադրվի`մինչեւ ուսումնառության ավարտը: Նախագիծն այսօր արժանացավ ԱԺ պաշտպանության եւ անվտանգության հարցերի մշտական հանձնաժողովի դրական եզրակացությանը: Նախագիծը հանձնաժողովում ներկայացրեց պաշտպանության փոխնախարար Գաբրիել Բալայանը: Ասաց`այսպիսով փորձում են ապահովել մարդու կրթական սահմանադրական իրավունքը:
Այս զորակոչի համար 11 հոգի կա նման խնդիր ունեցող, նրանցից 10-ը ՌԴ-ից է վերադարձել: Այդ դեպքում, ինչպես հայտնի է, աշակերտը մեկ տարի ցածր դասարանում է ուսումնառությունը շարունակում եւ զորակոչային տարիքի հետ կապված արդեն խնդիր է առաջանում:
Հանձնաժողովի նախագահ Կորյուն Նահապետյանը հետաքրքրվեց`կոռուպցիոն ի՞նչ հնարավորություններ են հնարավոր զորակոչից խուսափելու համար: Գաբրիել Բալայանը մանրամասնեց`երկար են քննարկել, նկատի են ունեցել հնարավոր ռիսկերը եւ եթե անձը վատ առաջադիմության պատճառով մնա նույն դասարանում, կառավարությունը կարող է մերժել երկրորդ անգամ տարկետում տրամադրելը: Կորյուն Նահապետյանը պնդեց`կառավարության որոշումով պետք է ամրագրել բոլոր հիմքերը, այդ թվում նաեւ մերժման, որպեսզի քաղաքացիների համար էլ գործընթացը հասկանալի լինի:
Մանրամասները` տեսանյութում
Կորյուն Նահապետյանը փոխնախարարին խնդրեց նաեւ թվային համեմատություններ անցկացնել զորակոչին մասնակցող ներգաղթած երիտասարդների մասով, քանի որ պաշտպանության նախարարն էլ էր խոսել դրական դինամիկայի մասին: Փոխնախարարն ասաց`այս պահին չի տիրապետում թվերին, բայց վաղը, խորհրդարանի արտահերթ նիստից առաջ, անպայման կներկայացնի: Նաեւ տարակուսեց` 2018-ի զորակոչը ամբողջությամբ չի ավարտվել, գուցե ճիշտ չէ հիմա նման ամփոփումներ անել: Ամեն դեպքում, պատգամավորը պնդեց` նախնական տվյալներ ներկայացրեք:
Ընդհանուր զորակոչի թվային տվյալներ էլ փոխնախարարը չհրապարակեց, դրանք գաղտնի են, բայց ասաց`ամեն ինչ նորմալ է:
Նելլի ԳՐԻԳՈՐՅԱՆ
