Կոռուպցիոն բացահայտումներով բյուջեն համալրելն ու սոցիալական կամ զարգացման ծրագրեր իրականացնելը չի կարող երկարաժամկետ լինել: Արտադրությունը պիտի աշխատի: Աշխատատեղերն են այսօրվա գլխավոր խնդիրը:
Պատահական չէ, որ իր վարչապետության ընթացքում առաջին չլուծված խնդիրը Նիկոլ Փաշինյանի համար դարձավ Ամուլսարը, երբ նրա առաջարկը չընդունվեց: Ամուլսարը Հայաստանի համար միայն բնապահպանական կամ միայն տնտեսական խնդիր չէ: Բնապահպանների ու «Լիդիան Արմենիայի» հակասությունները հանգեցնում են ընտրության` ի՞նչ է ուզում պետությունը` բնական ռեսուրսների պահպանությու՞ն, թե՞ հանքարդյունաբերության զարգացում: Հարցը կարող էին հանել ժամանակակից տեխնոլոգիաները: Հայաստանը միակ երկիրը չէ, որտեղ ոսկի է արդյունահանվում:
Ջերմուկում Նիկոլ Փաշինյանն առաջարկեց ժամանակ տալ կառավարությանը՝ հարցը ուսումնասիրելու համար, բնապահպանները պահանջում են այդ ընթացքում հանքը չշահագործել, «Լիդիան Արմենիան»` շահագործել: Պայմանագրից հրաժարվելու դեպքում, որով 12 տարում կատարվել է աշխատանքի 80 %-ը, Հայաստանին սպառնում է դատական պատասխանատվություն: Եվ դա կդառնա ոչ միայն կոնկրետ մեկ ընկերության ու Հայաստանի խնդիրը, այլև խնդիր Հայաստանի դեմ, որ կխոչընդոտի ներդրումներին մի երկրում, որտեղ կառավարությունը փակում է գործող բիզնեսը: Նիկոլ Փաշինյանի կասկածները, որ Հայաստանը փորձում են ներքաշել դատական գործընթացի մեջ, հիմնավոր են:
Նախ` Հայաստանը ստիպված կլինի վճարել կատարված ներդրումները, չստացած շահույթի վնասը և պայմանագիրը կասեցնելու տուգանքը` եթե կա նման կետ պայմանագրում: Հարցի քննարկումները կշարունակվեն, բայց «Լիդիան Արմենիան» ամեն օր կրում է կոնկրետ կորուստներ, իսկ Հայաստանի հպարտ քաղաքացիները չեն նահանջում բնապահպանական խրամատներից:
Բացի Ամուլսարի խնդիրներից` մնում է պարզել` բնության նկատմամբ սե՞րը, թե՞ այլ գործոններ կան` ո՞վ և ինչու՞ է բնապահպաններին խրամատավորել: Եվ ընդհանրապես` շատ չե՞ն խրամատները Հայաստանում: Հեղափոխության կենսական էներգիան չի՞ վերածվում նեգատիվ էներգիայի, որ կազմաքանդում է` փոխարենը ոչինչ չստեղծելով` բացի հուզական-պոպուլիստական խորապատկերը, որ բնորոշ է կա՛մ նախահեղափոխական, կա՛մ նախընտրական շրջանին, բայց գործ` աշխատանք ու հաց, չի դառնում:
Անահիտ ԱԴԱՄՅԱՆ
Հոդվածն ամբողջությամբ՝ «Իրատես» թերթի այսօրվա համարում
