ՀՀ տարածքային կառավարման և զարգացման նախարար Սուրեն Պապիկյանին
Կապան համայնքի ղեկավար Աշոտ Հայրապետյանին
Հարգելի՛ պարոն Պապիկյան
Կարդացեք նաև
Աշոտ Հայրապետյանը մեր համայնքը ղեկավարում է 2012 թվականից, 2016 թվականի հոկտեմբերի 2-ին վերընտրվել Է Կապան համայնքի ղեկավար: 2017թ. նոյեմբերի 5-ին ընտրվել է Կապան խոշորացված համայնքի ղեկավար: Այս տարիների ընթացքում համայնքում զգալի է առաջընթացը, մտավոր ներուժի գնահատումն ու կիրառումը, ակտիվացել է համագործակցությունը տեղական ու միջազգային կազմակերպությունների հետ, որի արդյունքում համայնքը նաեւ մեր հանրապետությունից դուրս ունի բարի համբավ: Այս ընթացքում Կապանն անդամակցել է միջազգային կառույցների, պարոն Հայրապետյանը ներկայացրել է Հայաստանի համայնքները միջազգային տարբեր համաժողովներում:
Այս դրական աշխատանքային և գործընկերային վստահության արդյունքում Կապանում ներդրվել ու իրականացվել են ծրագրեր միջազգային դոնորների միջոցով: Համայնքում խորհրդային տարիներից հետո առաջին անգամ ընթացքի մեջ է նոր մանկապարտեզի շինարարությունը,ևս մեկի շինարարությունը պետք է սկսվի այս տարի և այլն: Վստահելի գործընկերոջ բացակայությունը կարող է նաև վտանգել սկսված ծրագրերը, խոստացված ներդրումները:
Աշոտ Հայրապետյանը 2015 թվականին «Համազգային վստահության խորհուրդ» ՀԿ կողմից ճանաչվել է «Լավագույն քաղաքապետ», 2015թ.Կապանը Հայաստանի համայնքների միության և ՀՀ տարածքային կառավարման և զարգացման նախարարության կողմից ճանաչվել է «Լավագույն քաղաքային համայնք», 2015թ. հաղթող է ճանաչվել Եվրոպայի խորհրդի հայտարարած «Հայաստանի համայնքների լավագույն գործելակերպ» մրցույթում, 2016-ին Կապանը Հայաստանի համայնքների միության և ՀՀ տարածքային կառավարման և զարգացման նախարարության կողմից ճանաչվել է «Մշակութային լավագույն համայնք», 2017-ին ՀՀ նախագահի մրցանակի համար «Լավագույն մարզական համայնք» մրցույթում գրավել է 3-րդ տեղ…
Համայնքում շրջանառվող կարծիքների համաձայն՝ Աշոտ Հայրապետյանի հրաժարականի հիմք է դարձել 2018թ. հուլիսի 5-ին Կապանի Գ.Նժդեհի հրապարակում կատարվածը. կարծում ենք, որ դա չի կարող պատճառ դառնալ համայնքի ղեկավարի հրաժարականի համար:
Հարգելի՛ պարոն Պապիկյան, ելնելով այս ամենից, կոչ ենք անում Ձեզ՝ չընդունել Կապան համայնքի ղեկավար Աշոտ Հայրապետյանի հրաժարականը:
Հարգելի՛ պարոն Հայրապետյան
Ելնելով Ձեր ներկայացրած հրաժարականի դիմումից և մեր համայնքում այսօր ստեղծված իրավիճակից՝ կոչ ենք անում հիշել, որ մեր համայնքի բնակչության զգալի մասը ՏԻՄ ընտրություններում սատարել է Ձեզ, տվել իր քվեն, ունի ակնկալիքներ ու սպասելիքներ իր կատարած ընտրությունից, և այսօր հրաժարական ներկայացնելը նշանակում է ի դերև հանել այդ մարդկանց հույսերը, հիշել, որ Դուք ունեք պատասխանատվություն, ծրագրածն ու նախաձեռնածը ավարտելու պարտավորություն, և ի շահ համայնքի հորդորում ենք շարունակել աշխատանքը։
09 հուլիսի 2018թ.
ԿԱՊԱՆ ՀԱՄԱՅՆՔԻ ԱՎԱԳԱՆՈՒ ԱՆԴԱՄՆԵՐ
/ՍՏՈՐԱԳՐԵԼ Է ԱՎԱԳԱՆՈՒ 9 ԱՆԴԱՄ/
