«Մատակարարումների առումով որոշ զորամասերի հետ կապված խնդիրներ են առաջացել: Կադրային լուծումներ կլինեն: Նրանք, ովքեր պատշաճ չեն կատարել իրենց պարտականությունները, պատասխանատվության կենթարկվեն»,-ՀՀ կենտրոնական զինվորական հավաքակայանում լրագրողների հետ ճեպազրույցում այսօր հայտարարեց ՀՀ վարչապետ Նիկոլ Փաշինյանը՝ հայտնելով, որ այդ մասին իրեն ահազանգեր են հղվել: «Կոռուպցիայի դեմ պայքարում անզիջում ենք լինելու: Մեծ ծավալի կոռուպցիա կա նաեւ ԶՈԻ-ում: Որքանով որ կա, այդքանով կբացահայտվի»,-վստահեցրեց Նիկոլ Փաշինյանը:
Նրա փոխանցմամբ՝ ահազանգեր են ստանում նաեւ այն մասին, որ որոշ զորամասերում սննդի որակի հետ կապված խնդիրներ կան. «Դրանք համապատասխան ընթացք են ստացել: Առհասարակ, աշխատելու ենք զինվորների հագուստի, սննդի որակը բարելավել: Այդ ամենը չպետք է սոցիալական բեռ դառնա ծնողի ուսերին, բայց դա չի նշանակում, թե պետք է քննադատել, երբ ծնողն իր ծառայող որդու համար խորոված կամ տորթ է տանում»:
Ինչ վերաբերում է գնահատականներին, թե նախկինում պաշտոնյաների որդիները չէին ծառայում, վարչապետը չհամաձայնեց. «Չէի ասի…Համենայն դեպս, մենք այդ տեղեկությունը ճշտում ենք ու այս պահին պաշտոնական պնդումներ չեմ կարող անել»:
Լուիզա ՍՈՒՔԻԱՍՅԱՆ
