Կրոնագետը «կաթողիկոսի աղջկան» ԴՆԹ անալիզ հանձնելու կոչ անողներին Սահմանադրության մասին է հիշեցնում

«Որեւէ մեկը չի հրաժարվում այն մտքից, որ Հայ առաքելական  եկեղեցու բարեփոխման հիմքերը պետք է դրվեն, բայց ամենայն հայոց կաթողիկոսի հրաժարականի պահանջը չպետք է վերածվի համաշխարհային հնչեղության խայտառակության, չպետք է շարունակվի ֆիզիկական ճնշումներով: Եկեղեցուն քաղաքական ռիթմի տակ դնելը բացասական ձգտում է»,-«Հենարան» մամուլի ակումբում այսօր անդրադառնալով ամենայն հայոց կաթողիկոսի հրաժարականը պահանջող «Նոր Հայաստան, նոր հայրապետ» նախաձեռնության վերջին օրերի բողոքի գործողություններին, ասաց կրոնագետ Վարդան Խաչատրյանը:

Նա համաձայն չէ Գարեգին երկրորդի հրաժարականը պահանջողների պնդման հետ, թե վեհափառ հայրապետը  կաշառքով է ընտրվել. «Եթե այդպես է, հարցադրում անեմ՝ ուրեմն նախո՞րդն էլ է կաշառքով ընտրվել…»: Ինչ վերաբերում է ցուցարարների, մասնավորապես ՝ տեր Կորյուն աբեղա Առաքելյանի պնդմանը, թե ամենայն հայոց կաթողիկոսը կուսակրոնության ուխտ է խախտել, ասել է թե՝ զավակ  ունի, Վարդան Խաչատրյանը նկատեց. «Եկեք հասկանանք, որ մարդու  անձնական կյանքի իրավունքի հարց է դրվում, որը օրենքով է ամրագրված, ու ստացվում է, որ անձնական կյանքի հանդեպ ներխուժում է կատարվում: Սա սահմանադրության խախտում է: Ասում են՝ «աղջկան ասենք ԴՆԹ անալիզ տա, գումարը կտանք»  այլն… հիմա ի՞նչ՝ պետք է ստիպես անալիզ տա՞լ»:

Կրոնագետն անդրադարձավ ցուցարարների պահանջին, թե ամենայն հայոց հայրապետը պետք է հրաժարական տա, որովհետեւ մինչ օրս կարգալույծ չի արել Պոլսո Հայոց պատրիարքի փոխանորդ տեր Արամ արքեպիսկոպոս Աթեշյանին: «Աթեշյանի դեմ գործողությունները կարող են հանգեցնել եկեղեցու պառակտմանը: Նա  միայնակ չէ, նրա թիկունքում թուրքական իշխանություններն են, հասկանո՞ւմ եք: Նրանք գերագույն հաճույք կստանան, եթե հայոց եկեղեցին պառակտվի»,-ընդգծեց Վարդան Խաչատրյանը:

https://www.facebook.com/aravot.am/videos/2069742463044258/

Լուիզա ՍՈՒՔԻԱՍՅԱՆ