Առաջիկա խորհրդարանական ընտրությունները լինելու են կերպարի, Նիկոլ Փաշինյան կերպարի ընտրություն. Համլետ Հայրապետյան

«ԵԿՄ նախագահի պաշտոնում Արամ Սարգսյանին առաջադրելու որոշումն ընդունվել է միաձայն: Արամ Սարգսյանն էլ պատասխանել է, եթե համագումարը կայացնի որոշում, ապա ինքը չի մերժի»,-«Հայելի» ակումբում լրագրողների հետ հանդիպմանը հայտարարեց ԵԿՄ վարչության փոխնախագահ Համլետ Հայրապետյանը:

Տեղեկացնենք՝ վերջին օրերին Աշտարակի ձորում անցկացվեց ԵԿՄ վարչության հավաք, որի ընթացքում որոշվել է ԵԿՄ նախագահի պաշտոնում առաջադրել Արամ Զավենի Սարգսյանի թեկնածությունը։ Անդրադառնալով ԵԿՄ համագումարին՝ պարոն Հայրապետյանը նշեց, որ ունեն նաև ֆինանսական խնդիրներ, քանի որ ԵԿՄ հաշիվները արգելանքի տակ են: Համլետ Հայրապետյանի փոխանցմամբ՝ Արամ Սարգսյանն առաջարկեց համագումարն անցկացնել սեպտեմբերին, դա ընդունվեց: Պարոն Հայրապետյանը հայտնեց. «Ստեղծելու ենք նախաձեռնող խումբ, որը կղեկավարեն վարչության նախագահի տեղակալները, որոնք յոթն են: ԵԿՄ ցանկացած անդամ կարող է մասնակցել նախաձեռնող խմբի անդամներին»:

ԵԿՄ վարչության փոխնախագահ Ղուկաս Ուլիխանյանը վստահեցրեց՝ ԵԿՄ-ն պետք է ընտրեր այնպիսի վարչության նախագահի, որը բոլորի համար ընդունելի կլիներ: Իսկ Արամ Սարգսյանն այդպիսի թեկնածու է. «Առաջարկ եղավ մարզի տղաների կողմից Արամ Սարգսյանին, նա ընդունեց, բայց նաև ճշտելիքներ ուներ երկրի ղեկավարության հետ: ԵԿՄ-ն մի հզոր կառույց է, եթե չլինի պետական հովանավորություն, կազմակերպությունը պահել անհնարին է: Այդ խնդիրները լուծելուց հետո բոլոր բաժանմունքներին և մարզխորհրդի նախագահներին հրավիրեցինք Աշտարակի ձոր: Նրանք հայտնեցին, որ կանգնած են Արամ Սարգսյանի կողքին»:

Պարոն Ուլիխանյանը նշեց՝ պատվիրակները համագումարում ընտելու են վարչության նախագահ:

Անդրադառնալով Սեյրան Սարոյանի, Սեյրան Օհանյանի կողմից ԵԿՄ վարչության նախագահի պաշտոնում առաջադրվելու հարցին՝ պարոն Հայրապետյանը հայտնեց, որ նման թեկնածություն չի քննարկվել: «Կոռնիձոր» ջոկատի հրամանատար Արայիկ Խուդավերդյանի՝ ԵԿՄ նախագահի պաշտոնում հնարավոր առաջադրման մասին նա հայտնեց. «Նա այս պահին որևէ բաժանմունքում կանգնած չէ հաշվառման: Եթե որևէ բաժանմունքից նրան առաջարկեն համագումարի պատվիրակ, մարդը կարող է համագումարին ձեռք բարձրացնել և ինքնաառաջադրվել»:

Այն  մտահոգություններին, եթե Արամ Սարգսյանը լինի ԵԿՄ նախագահ, կառույցը կլինի քաղաքականացված, պարոն Հայրապետյանը պատասխանեց. «Եթե որևէ մեկը մտածում է, որ առաջիկա խորհրդարանական ընտրությունները լինելու են գաղափարական և կուսակցական, իմ խորին համոզմամբ՝ չարաչար սխալվում են: Առաջիկա խորհրդարանական ընտրությունները լինելու են կերպարի, Նիկոլ Փաշինյան կերպարի ընտրություն: Արամ Սարգսյանը դաշինքի անդամ է, ինքն ունենալու է նորից իշխանություն: Եթե ամենահզոր տղան, որը պատերազմ է անցել այսօր, երեկ և ապագայում էլ հնարավորություն ունենա գալ ԵԿՄ նախագահ և չունենա իշխանության հովանավորչություն, այս կազմակերպությունը շատ կարճ ժամանակ հետո կլուծարվի: Իհարկե, երկրապահը պետականամետ կազմակերպություն է, բայց երկրապահի ցանկացած անդամ ազատ է իր ընտրության մեջ: Խնդիր չկա երկրապահին մտցնել ընտրությունների մեջ»:

Պարոն Ուլիխանյանը հավելեց՝ Մանվել Գրիգորյանը, թեև սատարել է ՀՀԿ-ին, բայց երբեք չի ասել ԵԿՄ-ականներին սրան կամ նրան կտաք ձայն:

Դառնալով ազատամարտիկների դաշինքի դժգոհություններին՝ պարոն Հայրապետյանն ասաց.  «Չեմ ուզում անձերի ասածներն այստեղ քննարկել, ամեն մարդ կարծիք հայտնելու իրավունք ունի: Եթե խանգարում է կառավարման համակարգի խնդիրը, իրավունք ունեմ կարծիք հայտնելու, որ նրանք այլ ակնկալիքներով էին գալիս, գալիս էին, որ իշխանության մաս վերցնեն: Բոլորս մեկ ենք լինելու և միասին ենք ղեկավարելու ԵԿՄ ընտանիը: Թող գան, կանգնեն մեր կողքին որպես շարքային երկրապահ և երկրապահական ընտանիքը մեր ժողովրդի աչքին բարձրացնենք: Այն, ինչ տեղի ունեցավ, երկրապահի ճակատին որպես սև խարան մնաց: Պայմաններով չեն գալիս հայրական տուն, իրենց հարազատ ընտանիք»:

Տաթև ՀԱՐՈՒԹՅՈՒՆՅԱՆ