Ֆինլանդիայում ավարտվեց լողի Եվրոպայի պատանեկան առաջնությունը: Հայաստանի ներկայացուցիչներից գերազանց հանդես եկան մեր երկու առաջատարները՝ Արթուր Բարսեղյանը եւ Վարսենիկ Մանուչարյանը:
Արթուրը 50 մետր դելֆին՝ 0.25,52 (Հայաստանի նոր ռեկորդ) եւ 100 մետր ազատ ոճերում՝ 0.51,84 արդյունքով Բուենոս Այրեսում կայանալիք պատանեկան օլիմպիական խաղերի Բ վարկանիշ ձեռք բերեց: Միջազգային կարգի սպորտի վարպետ պատանին նաեւ Ա կարգի վարկանիշ եւ պատանեկան օլիմպիական խաղերին մասնակցելու ուղեգիր նվաճեց 50 մետր ազատ ոճում՝ մրցատարածությունն անցնելով 0.23,84 վայրկյանում:
Լողի հայկական դաշնությունից մեզ տեղեկացրին, որ սա Հայաստանի լողի պատմության մեջ առաջին դեպքն է, որ հայաստանցի մարզիկը Ա կարգի վարկանիշ է նվաճում:
Մեր աղջիկների առաջատար Վարսենիկ Մանուչարյանը Ֆինլանդիայում ՀՀ նոր ռեկորդ գրանցեց 50 մետր դելֆին լողաոճում: Հիմա այն հավասար է 0.29,96-ի:
Աշոտ ՀԱԿՈԲՅԱՆ
