Տարիներ շարունակ և հատկապես վերջին տասնամյակում քաղաքացիները ոչ թե բարձրաձայնում, այլ բղավում էին, որ բյուջեի միջոցները մսխվում են, սփյուռքի հայրենակիցների տրամադրվող գումարները չեն ծառայում իրենց նպատակին:
Բարձրագույն իշխանությունում այդ ամենը քար լռության է մատնվել:
Թավշյա հեղափոխությունից հետո ամեն օր, եթե ոչ ժամ առ ժամ բացահայտվում է մի նոր փոթորկալի թալան:
«Հայաստան» հիմնադրամի գործադիր տնօրեն Արա Վարդանյանը մի թեթև սեր է ունեցել կազինոյի հետ և ստիպված տրամադրված վարկային գծից գումար է վերցրել…:
Ի դեպ, կազինոներ հաճախել դեռ չի նշանակում հաղթած դուրս գալ և գումար բերել ու ներդրում կատարել «Հայաստան» հիմնադրամի հաշվարկային հաշվին: Եթե այդպես լիներ, մերոնք կարգին խաղացող լինեին, Մոնտե Կառլոյից և Բադեն-Բադենից որքա՜ն գումար կբերեին ի շահ Հայաստանի Հանրապետության բարգավաճման:
Ամեն դեպքում հիմնադրամի տնօրեն Արա Վարդանյանը 1 մլն. դրամ գրավի դիմաց ազատ է արձակվել և չի կալանավորվել: Բնականաբար հարց է ծագում` ինչպե՞ս պետք է վերականգնվի գրավ դրված գումարը, եթե նա այլևս կազինո չհաճախի:
Կարծում եմ հետայսու պետք է աջակցել կազինո հաճախող Արա Վարդանյանին և նման հակումներ ունեցող մեր մյուս հաճախորդներին, որպեսզի նրանց տրամադրվի օվերդրաֆտ` վարկային գիծ:
Հավանաբար մեր երկրի 7 մլրդ. ԱՄՆ դոլար արտաքին պարտքի ծախսային որոշ մաս առանձին հոդվածներով հատկացվել է կազինոներին ու գիշերային ակումբներին, որպեսզի իշխանավորները քրտնաջան աշխատանքից հետո մի փոքր լիցքաթափվեն:
Գառնիկ ՎԱՂԱՐՇԱԿՅԱՆ
