Դատավոր Արշակ Վարդանյանի նախագահությամբ՝ ՀՀ ոստիկանության ՊՊԾ գունդը գրաված եւ մի շարք ծանր հանցագործությունների կատարման համար մեղադրվող «Սասնա ծռեր» խմբի անդամների գործով հերթական դատական նիստն այսօր սկսվեց առանց ամբաստանյալներից Մարտիրոս Հակոբյանի՝ «Դեդ»-ի: Նա տեղափոխվել էր հիվանդանոց՝ «ձախ վերջույթների սուր թրոմբոզ» ախտորոշմամբ: Նիստին ներկայացել էր ամբաստանյալներից Արամ Հակոբյանը, որի բացակայության պատճառով նախորդ նիստը հետաձգվել էր:
«Առանց բժիշկների թույլտվության՝ նա եկել է նիստին, թեեւ վիճակը լավ չէ: Նա շատ ծանր է տարել, որ իր չներկայանալու պատճառով նիստը հետաձգվել է, այն էլ այն դեպքում, երբ ընկերների՝ խմբի մյուս անդամների խափանման միջոց կալանքը փոխելու հարցը պետք է քննարկվեր»,-իրավիճակն այսպես բացատրեց Արամ Հակոբյանի շահերի պաշտպան Տիգրան Եգորյանը։
Ապա պաշտպանական կողմից միջնորդություններ ներկայացվեցին՝ ամբաստանյալներից Թաթուլ Թամրազյանի եւ Գեւորգ Իրիցյանի համար նշանակել դատաբժշկական փորձաքննություն: Ըստ պաշտպանների՝ փորձաքննությունը կհաստատի՝ իրենց պաշտպանյալների առողջական խնդիրները համատեղելի՞ են կալանքի հետ, թե ոչ: Այդ հիմքով նրանք պատրաստվում են Իրիցյանի եւ Թամրազյանի խափանման միջոց կալանքը փոխելու միջնորդություն ներկայացնել: Նախորդ այդպիսի միջնորդությունները, որոնց հիմքում չկային դատաբժշկական փորձաքննությունների արդյունքներ, մերժվել էին:
Լուիզա ՍՈՒՔԻԱՍՅԱՆ
