Մայր Աթոռում պահվող եզակի մասունք Սուրբ Գեղարդը չի վաճառվել, այլ մի մասը նվիրվել է ռուս քաղաքապետի: Այս մասին այսօր Ամենայն Հայոց կաթողիկոս Գարեգին Բ-ի հրաժարականը պահանջող «Նոր Հայաստան, նոր հայրապետ» նախաձեռնության անդամներին ասել է Մայր Աթոռի դիվանապետ Արշակ Սրբազանը: Ցուցարարները պնդում էին, որ այն վաճառվել է: Ցուցարարների հարցին, թե ով է Գեորգի Պոլտավչենկոն, ինչո՞ւ է տրվել այդ քաղաքապետին, հոգևորականն ասել է, որ ինքը չի պատասխանում ցուցարարներին: Նշենք, որ Գեորգի Պոլտավչենկոն Սանկտ Պետերբուրգի քաղաքապետն է:
Լրագրողների հետ զրույցում իր հայտարարության վերաբերյալ պարզաբանում տալով՝ Մայր Աթոռի դիվանապետն ասել է. «Եկեղեցիների շփման պրակտիկայում գոյություն ունի մասունքների փոխանակման փորձառություն, մասունքներ մենք ունեցել ենք Գրիգոր Լուսավորչի ժամանակաշրջանից, կաթոլիկ եկեղեցին առաքյալների մասունքներ է բերել, Նեապոլից Գրիգոր Լուսավորչի մասունքը բերվեց, այո, ռուս եկեղեցու պետի խնդրանքով Գեղարդից մի փոքրիկ հատված է նվիրվել: Սա իրականություն է»:
Մայր Աթոռի տեղեկատվական համակարգի ղեկավար Վահրամ քահանա Մելիքյանն իր ֆեյսբուքյան էջում գրել է. «ՊԱՇՏՈՆԱՊԵՍ հայտարարում եմ, որ լուրերը, թե Մայր Աթոռ Սուրբ Էջմիածնում պահվող Սուրբ Գեղարդը վաճառվել է կամ վնասվել, կեղծ են։
Առաջիկային այն դուրս կբերվի հավատացելոց երկրպագության համար և մեր ժողովուրդը կտեսնի, թե համաքրիստոնեական սրբությունն անխաթար է և անվնաս»:
