ԱԺ-ում ՀՀ ընտրական օրենսդրության բարեփոխումների նպատակով ստեղծված խորհրդարանական աշխատանքային խմբի նիստում այսօր «Ծառուկյան» խմբակցության ներկայացուցիչ Սերգեյ Բագրատյանի կողմից քննարկման ներկայացվեց խմբակցության առաջարկներից մեկը՝ արգելել, որպեսզի ընտրությունների ժամանակ ընտրատեղամասերում լինեն սպաները: Ըստ Բագրատյանի՝ սպաները ճնշում են գործադրում զինվորների վրա եւ վերահսկում, թե ում են ընտրում:
Աշխատանքային խմբում ՀՀԿ ներկայացուցիչ, Պաշտպանության նախկին նախարար Վիգեն Սարգսյանին առաջարկը դուր չեկավ: Նա շեշտեց, որ շարքային զինվորների շարքում էլ կան ջոկատների հրամանատարներ՝ սերժանտներ, ու ստացվում է, որ նրանց ընտրական իրավունքն է խոչընդոտվում:
«Ջոկի հրամանատարն էլ է ղեկավար, նա էլ է քվեարկում, չեմ հասկանում՝ ի՞նչ եք ուզում սրանով ասել: Ուրեմն՝ քվեարկի շարքային կազմը, ու ջհանդա՞մ, որ զինվորների մեջ կան հրամանատարներ…Մի խոսքով, դժվար լուծելի խնդիր է դա»,-դժգոհեց Վիգեն Սարգսյանը, ապա վստահեցրեց՝ սպան չի հետեւում, թե ինչպես է քվեարկում զինվորը,-«ձեր առաջարկը քվեարկությունը միայն բարդացնում է»:
Սերգեյ Բագրատյանն ընդդիմացավ. «Նախորդ բոլոր ընտրությունների ժամանակ զինվորները սպայի ուղեկցությամբ են քվեարկել: Սպան կանգնել է քվեախցիկի կողքին, իսկ զինվորները քվեարկել են ՀՀԿ-ի օգտին ու դուրս եկել: Ես ինքս գնդապետին դուրս եմ հանել տեղամասից: Այդ ամենը մենք տեսախցիկներով ենք ֆիքսել»:
«Ծառուկյան» դաշինքի ներկայացուցիչ Գեւորգ Պետրոսյանն էլ շարունակեց գործընկերոջը. «Տեսել եմ՝ սպան քիթը չի «խոթում» քվեախցիկի մեջ, բայց հայացքով հսկում է»:
Կուսակցությունների ներկայացուցիչները կարծիքներ հնչեցրին, որ առհասարակ պետք է բացառել, որպեսզի ինչ-որ մեկը հսկի ընտրողներին, եւ այդ պարտականությունն առաջին հերթին հանձնաժողովների անդամներինն է:
https://www.facebook.com/aravot.am/videos/2064798080205363/
Լուիզա ՍՈՒՔԻԱՍՅԱՆ
