«Այն ուժերը, որոնք նախկին իշխանության շրջանում գործել են, քավարանով պիտի անցնեն». «Իրատես»

ԱԱԾ-ը շարունակում է բացահայտումների շղթան: Իշխանական նախկին համակարգն օր օրի փոշիանում է, սակայն թե դրա փոխարեն ինչ պետք է ստեղծվի, առայժմ հստակ չէ: Նորը ստեղծելը հեշտ գործ չէ` խելք, փորձ, ունակություն և գայթակղություններից հեռու կադրեր, այլապես կլինի նոր Հայաստան, բայց հին մեխանիզմներով: Առայժմ խիստ անորոշ է ապագան, գուցե պատճառը նաև այն է, որ բոլորը, այդ թվում` կառավարությունը, սպասում են առաջիկա ընտրություններին, երբ պարզ կերևա, թե քաղաքական ինչ գունապնակ և պետության կառավարման ինչ հայեցակարգ են ներկայացվում հասարակությանը: Իսկ մինչ այդ այսօրվա ներքաղաքական զարգացումների շուրջ զրուցեցինք «Ժառանգություն» կուսակցության վարչության նախագահ ԱՐՄԵՆ ՄԱՐՏԻՐՈՍՅԱՆԻ հետ:

-Հետևելով այսօրվա ներքաղաքական կյանքի զարգացումներին, ԱԱԾ-ի բացահայտումներին, ի՞նչ հետևությունների եք հանգել:

-Մենք ինչ-որ ժամանակ ապրել ենք ռազմաֆեոդալիզմի, հետո քրեաօլիգարխիկ համակարգում, արդյունքում ռազմա-քրեա-ֆեոդալա-օլիգարխիկ երկրում ենք ապրել: Այսպիսի պետության գոյության մասին մենք վաղուց ախտորոշում ներկայացրել ենք, իսկ այն, ինչ հիմա տեղի է ունենում, անխուսափելի էր: Հասարակությունը ցանկանում է տեսնել ոչ միայն «խոշոր ձկների» ազատազրկումը, այլև նրանց յուրացրած գումարների գոնե մի մասի վերադարձը բյուջե (տարբեր հաշվարկներով 25-30 մլրդ դոլարի յուրացում է եղել): Դրանով կարող ենք և՛ արտաքին պարտք փակել, և՛ սպառազինություն ձեռք բերել:

-Փոխվարչապետներից մեկը վերջերս միամտություն էր համարել այն կարծիքը, թե թալանած միջոցների վերադարձով կարելի է պետական պարտքը փակել:

-25-30 մլրդ դոլարի յուրացում է եղել, եթե դրա կեսն անգամ վերադարձվի, հնարավոր է լուծել այդ հարցերը: Միայն վերջին 10 տարում շուրջ 10 մլրդ դոլար է երկրից դուրս բերվել, այդ թալանածի մի մասն էլ մնացել է Հայաստանում՝ առանձնատների, օբյեկտների տեսքով: Այս գումարների գոնե կեսը կարելի է վերադարձնել: Այն բացահայտումները, որոնք այսօր ներկայացվում են, անշուշտ, դրական է, բայց քաղաքացիները սպասում են «խոշոր ձկներին»:

-ԱԱԾ բացահայտումներում մի հետաքրքիր նրբերանգ կա. հանրությանը ներկայացվում են այն թալանված միջոցները, որոնք բարոյական մեծ հարված են հասցնում ժողովրդին. բանակից ու զինվորից գողացված սնունդ ու հագուստ, համահայկական հանգանակությամբ հավաքված գումարներով խաղամոլությամբ զբաղվել: Այսինքն, փողի «կարասը» դեռ ԱԱԾ-ն չի բացահայտել, որտեղ Ձեր նշած գումարները կարող են լինել: Ի վերջո, կպարզվի` ով որքան միլիարդներ է օֆշորում պահում, որտեղ են խոշոր գումարները:

-Կարծում եմ` ինչ-որ ժամանակահատվածում այդ բացահայտումներին էլ հերթը կհասնի: Տեսեք` Մարտի 1-ի հետ կապված հոդված փոխվեց (բոլորի համար էլ ակնհայտ էր, որ իշխանության յուրացում է եղել), Միքայել Հարությունյանը ճանաչվել է մեղադրյալ:

Հոդվածն ամբողջությամբ կարող եք կարդալ «Իրատես» թերթի այսօրվա համարում