Ամեն անգամ, երբ ամռանը հանրապետություն տաք օդային հոսանքներ են թափանցում, ու ջերմաստիճանը գրեթե 50 աստիճանի է հասնում եւ նույնիսկ անցնում, բժիշկները քաղաքացիներին հորդորում են արեւի ուղիղ ճառագայթների տակ չմնալ, ստվերում քայլել: Այս օրերին հատկապես
սաղարթախիտ ծառերի կարիքն առավել է զգացվում: Դրանք ե՛ւ ստվեր են ապահովում, ե՛ւ շնչելու օդ` թթվածին: Սակայն տարիներ ի վեր թե՛ մայթերում, թե՛ այգիներում կատարված լայնամասշտաբ շինարարությունները մարդկանց անգամ ստվերում գտնվելու հնարավորությունից են զրկել: Այգիներն էլ, որոնք բարեկարգման անվան տակ պաստառապատվում են, վերակառուցման արդյունքում երկարամյա ծառերից զրկվում են:
Բարեբախտաբար, սաղարթախիտ ծառերով հարուստ է Վերնիսաժի երկայնքով ձգվող եւ դեպի կառավարության 3-րդ մասնաշենք տանող փողոցը: Անգամ 50 աստիճան շոգին այդ հատվածով քայլելիս տապը գրեթե կիսով չափ մեղմվում է: Քաղաքը կանաչով, թթվածնով ապահովելը քաղաքային իշխանությունների պարտքն է. դա հարգանք է սեփական քաղաքացիների եւ նաեւ մեր երկիրը նախընտրած զբոսաշրջիկների նկատմամբ:
Լուսանկարը` ԼՈՒՍԻՆԵ ԲՈՒԴԱՂՅԱՆԻ
«Առավոտ»
05.07.2018
