Վարչապետ Նիկոլ Փաշինյանն իրավապահներին հանձնարարել է Հյուսիս-Հարավ ճանապարհի Երեւան-Արտաշատ հատվածի շինարարությանն ավելի մեծ ուշադրություն դարձնեն: Այսօր Մեղրիում բնակիչներից մեկը վարչապետից հետաքրքրվեց`ինչո՞ւ ճանապարհի շինարարությունը սկսվեց Երեւան-Արտաշատ հատվածից, ոչ թե Մեղրի-Քաջարան հատվածից: Վարչապետն ասում է`հարց է, այնտեղ չարաշահումներ եղե՞լ են, թե ոչ: Եթե պարզվի, որ եղել են, վարչապետը հավաստիացնում է`բոլոր մեղավորները պատասխանատվության կենթարկվեն:
Հիշեցնենք, Նիկոլ Փաշինյանը երկօրյա այցով Սյունիքի մարզում է: Այսօր նա հանդիպում է ունեցել նաեւ Քաջարանում :
Նիկոլ Փաշինյանը անհասկանալի եւ անհեթեթ մոտեցում է համարում այն, որ ճանապարհի շինարարությունը սկսվեց Երեւան-Արտաշատ հատվածից. «Երեքշաբթի ինձ մոտ խորհրդակցություն է հրավիրված Հյուսիս-Հարավի հետ կապված: Լուրջ պրոբլեմներ կան ճանապարհի կառուցման հետ: Այժմ կան մի քանի ներդրումային ծրագրեր, որոնց հեղինակների գաղափարը հետեւյալն է՝ Սիսիանից Լիճք ճանապարհ կառուցել: Մենք լրջորեն կքննարկենք Հյուսիս-Հարավի խնդիրը՝ հասկանալու համար, թե ոնց ենք մենք առաջ գնալու եւ ինչպես ենք լուծելու խնդիրները»:
Նելլի ԳՐԻԳՈՐՅԱՆ
