Վրաստանում Հայաստանի դեսպանին պատանդ վերցնելու կոչի համար քրեական պատասխանատվության է ենթարկվել Վրաստանի քաղաքացի: Խոսքը վերաբերում է 2016 թ. ապրիլին Լեռնային Ղարաբաղում սրված հակամարտության ժամանակ սոցցանցում տեղադրված կոչին, հաղորդում է «Գրուզիա Օնլայնը»:
Ըստ գործի նյութերի՝ ահաբեկչության հանրային կոչ անելու մեջ մեղադրվողը Վրաստանի քաղաքացի է: Գործը «գաղտնի» կնիքի տակ է, սակայն IPN գործակալությանը հայտնի են դարձել որոշ մանրամասներ:
Մասնավորապես, ըստ գործի նյութերի, 2016թ., երբ Լեռնային Ղարաբաղում սրվել էր զինված հակամարտությունը, մեղադրյալը Վրաստանում ապրող ադրբեջանցիներին Facebook-ով կոչ է արել հավաքվել Հայաստանի դեսպանատան մոտ: Մեղադրյալը նաև կոչ է արել այրել հայկական դրոշը, ներխուժել Հայաստանի դեսպանատան շենք և պատանդ վերցնել դեսպանին:
Կոչն իրականություն չի դարձել, սակայն հեղինակի նկատմամբ քրեական հետապնդում է սկսվել երկու տարի անց: Այդ ընթացքում քննությունը սպասում էր պաշտոնական պատասխանների, այդ թվում Facebook-ից, որոնք պետք է հաստատեին, արդյոք Facebook-ում գրառում կատարողն իսկապես այն մարդն է, որի դեմ պատրաստվում էին քրեական հետապնդում սկսել:
Պաշտոնական մեղադրանք առաջադրելուց հետո մեղադրյալը գրավի դիմաց ազատ է արձակվել:
Պատրաստեց՝ Վիկտորյա ԱՆԴՐԵԱՍՅԱՆԸ
