ԱԺ-ում այսօր ՀՀ ընտրական օրենսդրության բարեփոխումների նպատակով ստեղծված խորհրդարանական աշխատանքային խմբի նիստում «Ելք» խմբակցության ներկայացուցիչ Լենա Նազարյանը շարունակում է ներկայացնել խմբակցության առաջարկները: Դրանցից մեկն է՝ Հանրային հեռուստատեսությամբ եւ Հանրային ռադիոյով բոլոր քաղաքական ուժերի համար ապահովել բանավեճերի եթերաժամանակ:
Աշխատանքային խմբում ՀՀԿ ներկայացուցիչ, Արդարադատության նախկին նախարար Դավիթ Հարությունյանին առաջարկը դուր չեկավ. «Միաժամանակ տասը կուսակցության միջեւ բանավեճ կազմակերպե՞լ: Դա արդյունավետ չէ: Միշտ պայքար է գնում, թե ով է ներկայացնելու քաղաքական ուժին այդ բանավեճի համար: Երբեմն «զոռբաներից» մեկին են ուղարկում բանավեճի: Ճիշտ ձեւաչափ չէ: Ավելի ճիշտ է նախատեսել, որ եթե օրինակ երկու քաղաքական ուժ պայմանավորվում են բանավեճի մասին, Հանրային հեռուստաընկերությունը եւ Հանրային ռադիոն պարտավոր են դա ապահովել»:
Լենա Նազարյանը Հարությունյանի դիտարկման հետ չհամաձայնեց. «Հայաստանյան քաղաքական դաշտում բանավեճեր կազմակերպելու խնդիր կա. քաղաքական գործիչները նախընտրական շրջանում խուսափում են բանավեճից, մարդիկ էլ չեն տեսնում, թե որ թեկնածուն է պատրաստված»: ՀՀԿ ներկայացուցիչ Արփինե Հովհաննիսյանն էլ շարունակեց Հարությունյանի միտքը. «Ճիշտ է, եթե երկու քաղաքական ուժ պայմանավորվում են բանավիճել, «Հանրայինը» նրանց դիմումի հիման վրա պետք է մեկ օրում իրազեկի բանավեճի օրվա եւ ժամի մասին»:
ՀՅԴ խմբակցության ներկայացուցիչ Սպարտակ Սեյրանյանը նշեց. «Վստահ չեմ, որ Հանրայինը կազմակերպչական առումով կկարողանա բանավեճեր կազմակերպել: Երբ կազմակերպողի գիտելիքների մակարդակը չի հերիքում տնտեսական կամ քաղաքական թեմաներով բանավեճեր անցկացնելու համար, ունենում ենք ոչ թե բանավեճ, այլ «գյալաջիություն»: Մարդկանց մոտ էլ տպավորություն է ստեղծվում, թե հաղթեց նա, ով ավելի բարձր գոռաց մյուսի վրա»:
Լուիզա ՍՈՒՔԻԱՍՅԱՆ
