ՀՀ ԶՈւ գլխավոր շտաբի կազմզորահավաքային վարչության պետ Կամո Քոչունցն այսօր լրագրողների հետ հանդիպմանն անդրադարձավ հարցին, թե արդյոք զորակոչվելու են Ռուսաստանի անձնագիր ունեցող հայ երիտասարդները: Նա նախ նշեց, որ Ռուսաստանի քաղաքացին չի կարող ծառայել ՀՀ զինված ուժերում, իսկ եթե կամավոր եկել է ու ցանկանում է ծառայել, կարող է դիմել:
«Իսկ եթե անձը ՀՀ քաղաքացի է, որը ծնվել է ՀՀ-ում, բայց որոշակի ժամանակահատվածում ձեռք է բերել նաեւ ՌԴ-ի քաղաքացիություն, տեղեկացնեմ, որ երկքաղաքացիություն որպես այդպիսին Ռուսաստան-Հայաստան մասով չկա: Բայց նրանք, ովքեր նաեւ ՌԴ քաղաքացի են, եւ կամավոր ցանկանում են ծառայել ՀՀ զինված ուժերում, կարող են դիմել»,-պարզաբանեց Կամո Քոչունցը:
Նա նաեւ նշեց, որ ըստ օրենքի՝ եթե ԱՊՀ երկրի ցանկացած քաղաքացի, որը ազգությամբ հայ է, 12 ամիս ծառայել է ԱՊՀ այլ երկրում, կարող է մնացյալ ծառայությունը շարունակել ՀՀ զինված ուժերում:
Լուիզա ՍՈՒՔԻԱՍՅԱՆ
