Հայտնել ենք հունիսի 29-ին տեղի ունեցած ավտովթարի մասին, երբ Նոյեմբերյան-Կողբ ավտոճանապարհի 2-րդ կիլոմետրին իրար են բախվել «ՎԱԶ-2107» եւ «ԲՄՎ» մակնիշի ավտոմեքենաները: Վթարից հետո «ՎԱԶ-2107»-ի վարորդի՝ Տավուշի մարզի սահմանամերձ Բերդավան գյուղի բնակիչ Ասատուր Նիազյանի կինը՝ Կարինե Աբազյանը տեղափոխվել է Նոյեմբերյանի բժշկական կենտրոն, այնտեղից էլ՝ Երեւանի «Սուրբ Գրիգոր Լուսավորիչ» բժշկական կենտրոն: Այսօր՝ հուլիսի 4-ին 53-ամյա Կ. Աբազյանը հիվանդանոցում մահացել է:
Բերդավանից տեղեկացանք, որ վթարի հետեւանքով վիրավորվել է նաեւ Ասատուր Նիազյանի 14-ամյա դուստրը, որը ծնոտի շրջանում վնասվածք է ստացել:
Ավտովթարից շուրջ մեկ շաբաթ առաջ մահացել է Ասատուր Նիազյանի մայրը: Սոցիալապես անապահով այդ ընտանիքը հայտնվել է բարդ իրավիճակում:
Հունիսի 29-ին տեղի ունեցած ավտովթարի կապակցությամբ ճանապարհային ոստիկանության 2-րդ սպայական գումարտակի 5-րդ սպայական վաշտում հարուցել է քրեական գործ՝ ՀՀ քրեական օրենսգրքի 242 հոդվածի 2-րդ մասի հատկանիշներով, գործի քննությունը կկատարի Տավուշի մարզային քննական վարչության Նոյեմբերյանի քննչական բաժինը:
Ոսկան ՍԱՐԳՍՅԱՆ
