Այսօր Aravot.am-ը արդարադատության նախկին նախարար Դավիթ Հարությունյանին հարցրեց՝ ՀՔԾ-ն Մարտի 1-ի գործով պաշտպանության նախկին նախարար Միքայել Հարությունյանին մեղադրանք էր առաջադրել Քրեական օրենսգրքի 300.1-ին հոդվածի 1-ին մասով, այն բանի համար, որ նա այլ անձանց հետ նախնական համաձայնությամբ տապալել է սահմանադրական կարգը` այն դեպքում, երբ ՀՔԾ-ի առաջադրած հոդվածը 2008-ին չի եղել, լրացվել է 2009-ին, Դուք այդտեղ խնդիր չե՞ք տեսնում:
Նա պատասխանեց. «Ոչ թե ես եմ խնդիր տեսնում, Սահմանադրությունն է տեսնում խնդիր: Ընդամենը անհրաժեշտ է ընթերցել Սահմանադրության 72-րդ հոդվածը: Ես հասկանում եմ, որ իշխանությունների համար շատ կարեւոր է ամենօրյա պահել լարվածությունը, բայց դա չի կարելի անել այս գնով: Ես կարծում եմ, որ սա շատ լուրջ հարված էր թե՛ այլ բացահայտումներին, թե՛ ընդհանրապես նպատակին: Այս շտապողականությունը, որի արդյունքում խախտվում է Սահմանադրությունը, ներողություն, դա անթույլատրելի է: Ես ցավով եմ դա նշում եւ հույս ունեմ, որ այսօր մեր իրավապահ մարմինները, առաջին հերթին խոսքս ուղղում եմ հենց իրենց, ավելի աչալուրջ կվերաբերվեն իրենց կատարած աշխատանքին, որովհետեւ նմանատիպ սխալներով նրանք արժեզրկում են մյուս աշխատանքները»:
Դիտարկմանը, որ ՀՔԾ պետը պարզաբանել է, թե նախկինում 300 հոդվածն է եղել, որի նկարագրությունը նույնն է եղել՝ Դավիթ Հարությունյան արձագանքեց. «Համադրեք ինքներդ եւ կտեսնեք»:
Հռիփսիմե ՋԵԲԵՋՅԱՆ
