Այսօր ԱԺ-ում լրագրողների հետ զրույցում արդարադատության նախկին նախարար, ԱԺ-ում ստեղծված Ընտրական օրենսգրքի աշխատանքային խմբի անդամ Դավիթ Հարությունյանն ասաց, որ իրենք պատրաստ են մեկ տարում գնալ արտահերթ ընտրությունների:
Հարցին, որ ասում են՝ մեկ տարի հետո անցկացնելը ՀՀԿ-ին ձեռնտու չէ, անցողիկ շեմը չի կարողանա հաղթահարել, Դավիթ Հարությունյանը չարձագանքեց:
Վարչապետին կից Ընտրական օրենսգրքի Բարեփոխումների հանձնաժողովը երկու որոշում էր ընդունել՝ անցողիկ շեմն իջեցնել մեկ տոկոսով եւ անցում ամբողջական փակ համամասնական ընտրակարգին: Հարցին՝ ի՞նչ վերաբերմունք ունեք այդ առաջարկներին՝ պարոն Հարությունյանը պատասխանեց, որ անցողիկ շեմի իջեցումը պետք է որոշակի նպատակ հետապնդի. «Խորհրդարանական համակարգերում շատ կարեւոր է, որպեսզի լինի կայուն խորհրդարանական մեծամասնություն, ընտրական շեմի նվազեցումը հակառակ ուղղությամբ է տանում պրոցեսը եւ ես ուզում եմ հասկանալ, թե որն է եղել խնդիրը: Կարելի է, եթե դուրս եկավ միշտ այս մի երկրի օրենսդրությունից վերցնել մի հատված, այն մյուս երկրի, բայց պետք է հասկանալ ստրուկտուրան, թե ինչի համար ենք մենք դա անում: Եթե մենք պլանավորում ենք հրաժարվել խորհրդարանական մոդելից, ես կարող եմ դա հասկանալ, եթե պլանավորում ենք անցում կատարել նախագահական, կամ կիսանախագահական կառավարման համակարգի, բայց կարծես թե այս պահին նման խնդիր դրված չէ, այդ դեպքում ինձ պետք է հասկանալ ինչո՞վ է պայմանավորված այդ առաջարկությունը»:
Դիտարկմանը, որ կայուն մեծամասնությունը դաշինքով կլինի՝ Դավիթ Հարությունյանն արձագանքեց, որ այլ երկրների փորձ կա. «Երկրներ կան, որ ընտրական շեմ են բարձրացնում, երկրներ կան, որ բոնուսային համակարգ ունեն, տարբեր մոդելներ կան: Մինչեւ չհասկանամ առաջարկության նպատակը, դժվար է հընթացս տալ գնահատական»:
Դավիթ Հարությունյանն ասաց, որ կուսակցությունների համակարգը կայացած չէ ու հարց է, թե մենք սրանով խթանո՞ւմ ենք նրանց կայացմանը, թե՞ նոր կուսակցությունների ստեղծմանն ենք խթանում. «Եթե գոնե լիներ, որ տարիներ շարունակ կուսակցությունների կազմը անփոփոխ է եւ ժամանակն է թարմ արյուն մտցնել խորհրդարան, այդ գաղափարը կընդունեի: Բայց դրդապատճառները պարզ չեն: Առանց դրդապատճառի մտցնել եւ ներմուծել ինչ-որ գաղափար շատ արհեստական է»:
Ինչ վերաբերում է փակ ցուցակներով ընտրություններին, Դավիթ Հարությունյանն ասաց, որ «Իմ խորին համոզմամբ, ՀՀ-ի ապագան հենց այն ընտրական մոդելն է, որը ներկայումս գործում է, սակայն այն բնականաբար ցույց կտար իր համայնքը ոչ թե հընթացս միանգամից, առաջին ընտրության ժամանակ, այլ մեկ, երկու, երեք ընտրական ցիկլերի ընթացքում: Ես հասկանում եմ, որ այս համակարգը բացասական տարրեր ունի, հատկապես այն կուսակցությունների համար, որոնք տարածքներում չունեն բաժանումներ: Այդ կուսակցություններն ունեն խնդիր: Պետք է բոլոր դրական եւ բացասական կողմերը համադրենք ու փորձենք գտնել առավել օպտիմալ լուծում»:
Դավիթ Հարությունյանն ասաց, որ չպետք է թույլ չտալ, որ կուսակցությունները դառնան փակ կառույցներ, որտեղ կուսակցության վերնախավը՝ նախագահը ինքը որոշի կուսակցականների հերթականությունը, դա վտանգավոր է, եւ երբեւէ թույլ չի տա ձեւավորվեն իսկապես ժողովրդավարական կուսակցություններ. «Կարծում եմ ժողովուրդը պետք է ազդեցություն ունենա այդ առումով: ՀՀ-ի համար ամենավտանգավոր մոտեցումը կլիներ, եթե հատուկ միջոցներ չձեռնարկվեն, որ քաղաքականությունը նաեւ մարզեր տեղափոխվի, առանց այդ էլ գերկենտրոնացրել ենք Երեւանում»:
Դավիթ Հարությունյանն ասաց, որ չեն կարող այս կամ այն երկրից «լավ բաները» վերցնել ու շիլաշփոթ դարձնել. «Եթե էդպես լինի, մեր երկիրը կդառնա ուղղակի աջաբսանդալ, ավելի վատ՝ շատ խայտաբղետ Ընտրական օրենսգիրք»
Ըստ պարոն Հարությունյանի, համամասնական ընտրակարգն ունի հարյուրից ավելի տեսակներ եւ կարող են գտնել միջանկյալ լուծումներ:
Հռիփսիմե ՋԵԲԵՋՅԱՆ
