Գագիկ Ծառուկյանի օգնականը կամ թիկնազորի պետը ձերբակալվել է: Սակայն տուժողի կինը երեկ լրատվական կայքերից մեկին փորձել է հավաստել, թե իր ամուսինը պարզապես սայթաքել է, իսկ Գագիկ Ծառուկյանը իրենց ընտանիքի բարեկամն է:
Հայաստանի ամեն բնակչի՝ առանց հավելյալ բացատրությունների էլ պարզ է, թե ինչ հանգամանքների բերումով կարող էր տուժածի կինը նման բան ասել: Ըստ այդմ, միջադեպը է՛լ ավելի լուրջ երանգներ է ստանում: Սա կարող է դառնալ թավշահեղափոխական իշխանությունների, հատկապես վարչապետ Նիկոլ Փաշինյանի կողմից անընդհատ տարփողվող «Նոր Հայաստանի» ոստիկանության, իրավապահ մարմինների առաջին լուրջ քննությունը: Դրա արդյունքներից էլ կերեւա. ինչ-որ բան փոխվո՞ւմ է, թե՞ ամեն ինչ նույնն է, դեռ մի բան էլ՝ հակառակը:
Բայց հիմնական դրվագներից մեկը, իհարկե, տուժողի կնոջ՝ Լիլիթ Հ.-ի՝ armlur.am-ին պատմած բացահայտ հեքիաթներն են, թե իր ամուսինը ընդամենը գնացել է զրուցելու Գագիկ Ծառուկյանի հետ, իրենց չեմպիոն որդուն օգնելու նպատակով, բայց ինչ-որ աթոռից սայթաքել է, ընկել, ինչի հետեւանքով էլ ստացել է այդ վնասվածքները։
Քննությունն իրականացնող մարմինը, կարծում ենք, լրացուցիչ պետք է քննի նաեւ տուժողի մերձավորների վրա ճնշում գործադրելու կամ կաշառելու տարբերակով քրեական պատասխանատվությունից խուսափելու լրջագույն կասկածները եւս:
Այստեղ, իհարկե, հարց է ծագում, թե արդյոք Նիկոլ Փաշինյանը իրավապահներին կհորդորի՞ հետեւողական լինել, թե՞ նրանց մենակ կթողնի Գագիկ Ծառուկյանի դեմ: Ի վերջո, Գագիկ Ծառուկյանը այս նոր իշխանության դաշնակիցն է: Օրենքը կտարածվի՞ թեկուզ ժամանակավոր դաշնակցի վրա: Թե՞ օրենքի առաջ բոլորը հավասար են, սակայն ոմանք ավելի հավասար են:
Մյուս կողմից՝ սա Նիկոլ Փաշինյանի համար վատ տարբերակ չէ՝ նկատի ունենալով առաջիկա արտահերթ ընտրությունները, եւ հատկապես այն, որ Գագիկ Ծառուկյանը ամենահավանական լուրջ մրցակիցն է լինելու, ավելին՝ ծառուկյանականները անթաքույց խոսում են հաջորդ ընտրություններում վճռորոշ մեծամասնություն ստանալու իրենց ախորժակի մասին:
Ա.ՀԱԿՈԲՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
