Այսօր կառավարության նիստում պաշտոնյաների առաջ հայկական արտադրության համակարգիչներ էին դրված: Նրանք այսուհետ կօգտագործեն ոչ թե աշխարհի հայտնի ընկերությունների համակարգիչները, այլ հենց հայկականը, այս մասին նիստում ասաց նաեւ վարչապետ Նիկոլ Փաշինյանը. «Սա, իմիջի փոփոխության հետ չէ կապված, այլ մոտեցման փոփոխության հետ է կապված, Ինչպես տեսնում եք հայկական արտադրության համակարգիչներ են տեղադրված կառավարության նիստում: Սա մեր քաղաքական մոտեցումն է, մենք հայտարարում ենք, որ Հայաստանում բարձր տեխնոլոգիաների զարգացումը մեզ համար առաջնահերթություն է, ընդ որում, ոչ միայն ծրագրային ապահովման իմաստով, այլ նաեւ կոնկրետ արտադրանքի իմաստով»:
Նիկոլ Փաշինյանն ասաց, որ պետք է առաջարկեն, որպեսզի Ազգային ժողովում էլ այսպիսի փոփոխություն տեղի ունենա, որպեսզի Ազգային ժողովի նիստերի դահլիճը նույնպես համալրվի հայկական համակարգիչներով. «Մեր երկրի, նաեւ կառավարության համար շատ կարեւոր է, որպեսզի Հայաստանում արտադրությունը զարգանա եւ մենք բոլորս մեր առօրյայում նախապատվությունը տանք հայկական արտադրությանը: Ինչպես տեսնում եք, այդպիսի հնարավորություն կա եւ, եթե կա, ես բոլոր հարկատուներին կոչ եմ անում նախապատվությունը տալ հայկականին, որովհետեւ եւ հաճելի է եւ շահավետ է եւ նաեւ մեծացնում է տեղական արտադրության եւ արտադրողների հնարավորությունները»:
Լուսինե ԲՈՒԴԱՂՅԱՆ
