Տարբեր տարիների Իջեւանում անցկացվել են քանդակագործական սիմպոզիումներ, որոնցից հետո աշխատանքները նվիրվել են քաղաքին: Սիմպոզիումի նախաձեռնությունը արվեստաբան Սարո Սարուխանյանինն էր ու այն ժամանակվա շրջկոմի առաջին քարտուղար Ջեմմա Անանյանինը:
Այժմ այգին համալրված է բազմաթիվ քանդակներով, այդ թվում՝ այգու պահակ Դոդո պապիկի: Քանդակների այգին իջեւանցիների սիրելի վայրերից մեկն է, հյուրերին հպարտությամբ են ներկայացնում: Չնայած պետք է փաստել, որ քանդակների մեծ մասը վնասված է:
Այգու հարեւանությամբ գտնվում է պատկերասրահը, որի այլ սրահներ, տեղացիների հավաստմամբ, շուտով սոցիալական ծառայությունների նպատակով կօգտագործվեն, ինչպես իջեւանցիներն են ասում`«անգործների կենտրոնին» կտրվի: Ցավոք, պատկերասրահում չկան պատշաճ պայմաններ, համապատասխան լուսավորություն` նկարների պահպանության համար:
Քանդակների այգու հարեւանությամբ պլաստիկի համար նախատեսված աղբամաններ կան, սակայն դրանք նպատակին չեն ծառայում, քանի որ դրանց մեջ լցված են ոչ միայն պլաստիկ շշեր: Արձանաշատ Իջեւանում տեղադրել են ոչ միայն Աշոտ Երկաթի արձանը, այլեւ չեն մոռացել նաեւ Ջեմա Անանյանին:
ԳՈՀԱՐ ՀԱԿՈԲՅԱՆ
Լուսանկարները՝ հեղինակի
«Առավոտ»
03.07.2018
