2016թ. հուլիսի 29-ին ոստիկանության ՊՊԾ գունդը գրաված «Սասնա ծռեր» զինված խմբին օժանդակելու եւ Սարի թաղում զանգվածային անկարգություններ կազմակերպելու համար մեղադրվող Անդրիաս Ղուկասյանի գործով հերթական դատական նիստում այսօր տուժողների հարցաքննությունը չկայացավ: Ոստիկանները, որոնք գործով որպես տուժող են անցնում, չէին ներկայացել հարցաքննության, ուստի դատարանը նրանց բերման ենթարկելու որոշում կայացրեց:
Ապա Անդրիաս Ղուկասյանի շահերի պաշտպան, փաստաբան Կարեն Մեժլումյանը ներկայացրեց միջնորդություն՝ տուժողների հարցաքննությունից առաջ իրենց «առաջադրած» վկաներին հարցաքննել, մասնավորապես՝ դեպքի վայրում աշխատած լրագրողներին եւ այն քաղաքական գործիչներին, որոնք կփաստեն, որ Ղուկասյանը զանգվածային անկարգություններ նախապատրաստելու մտադրություն չի ունեցել, օրինակ՝ Լեւոն Բարսեղյան, Արմեն Մարտիրոսյան, Դավիթ Սանասարյան:
Այս գործով մեղադրող-դատախազ Պետրոս Պետրոսյանը միջնորդության դեմ առարկեց, ասելով, որ արդեն իսկ սահմանված ընթացակարգը պետք չէ խախտել: Նույն հիմքով դատարանը մերժեց միջնորդությունը: Եթե հաջորդ նիստում վկաներին դատարան բերման ենթարկել չստացվի, նիստը կրկին կհետաձգվի:
Հիշեցնենք, որ վերջերս կալանքից ազատված Անդրիաս Ղուկասյանը կուսակցություն է հիմնել:
Լուիզա ՍՈՒՔԻԱՍՅԱՆ
