ՀՀ վարչապետ Նիկոլ Փաշինյանի որոշմամբ Արագածոտնի մարզպետի տեղակալներ են նշանակվել Անահիտ Սարգսյանը, Արծրուն Նիկողոսյանը եւ Գառնիկ Աթանեսյանը: Հուլիսի 3-ին մարզպետ Աշոտ Սիմոնյանը աշխատակազմին ներկայացրեց նորանշանակ փոխմարզպետներին:
Շնորհավորելով նորանշանակ պաշտոնյաներին՝ մարզպետը նշեց, որ բոլորի ջանքերը միտված են լինելու տարածքում կուտակված բազմաթիվ խնդիրների լուծմանը:
Մարզպետը լիահույս էր, որ կարճ ժամանակում ընթացքի մեջ կդրվեն բոլոր հիմնախնդիրների լուծմանը միտված գործողությունները՝ ի շահ մարզի հզորացման:
Ծանոթանալով աշխատակազմի ոլորտային պատասխանատուների հետ՝ մարզպետի տեղակալները շնորհակալություն հայտնեցին ջերմ ընդունելության համար եւ վստահեցրին, որ համատեղ աշխատանքի դրական արդյունքը տեսանելի կլինի ամենամոտ ժամանակներում: Նրանք միակարծիք էին մարզպետի այն տեսակետին, որ իրենց գործունեության մեջ պետք է բացառվի կուսակցական ցանկացած դրսեւորում:
Նորանշանակ փոխմարզպետներին աշխատակազմի անունից շնորհավորեց մարզպետարանի գլխավոր քարտուղար Հրաչյա Գեւորգյանը եւ վստահեցրեց, որ աշխատակազմը պրոֆեսիոնալ է եւ ի զորու է համատեղ լուծելու առաջադրված բոլոր խնդիրները:
Արագածոտնի մարզպետարան
