Երեւանի ավագանու «Ելք» խմբակցության քարտուղար Թեհմինա Վարդանյանը Aravot.am-ի հետ զրույցում մտահոգություն էր հայտնել Մալաթիա-Սեբաստիա վարչական շրջանի թիվ 19 պոլիկլինիկայի տնօրենի դեմ հարուցված քրեական գործի ընթացքի վերաբերյալ՝ հայտարարելով, որ քննությունն այդպես շարունակվելու կամ ձգձգվելու դեպքում ինքն անմիջականորեն կդիմի ոստիկանապետին:
Մեր հարցին, թե կոնկրետ ի՞նչ օրինակներ կարող է ներկայացնել, Թեհմինե Վարդանյանը պատասխանեց, որ հիմա նախաքննություն է ընթանում եւ ինքը ձեռնպահ կմնա օրինակներ նշելուց: Բայց բերեց մի փաստ, որն արդեն հրապարակվել է լրատվամիջոցներում եւ հանրայնացվել. «Շատ կարեւոր եւ ուշագրավ է, որ մինչեւ այսօր չի հարցաքննվել թիվ 19 պոլիկլինիկայի մամոգրաֆիայի ծառայություն իրականացնող պատասխանատու բժշկուհին: Դա առնվազն զարմանալու առիթ է տալիս, որովհետեւ ըստ իս նա գործող կարեւոր անձանցից մեկն է եւ առաջին հարցաքննվողներից մեկը պետք է լիներ այդ բժշկուհին: Կրկնում եմ, սարքը 1,5 տարի չի աշխատել, սակայն տպվել են դրամարկղի կտրոններ եւ դա արդեն խնդիր է: Ես այդ կտրոնները տրամադրել եմ ոստիկանությանը: Մոտ 10 օր առաջ մենք Երեւանի ավագանու «Ելք» խմբակցության ղեկավար Դավիթ Խաժակյանի, ինչպես նաեւ բուժաշխատողների հետ միասին վկայություն ենք տվել ոստիկանությունում եւ սպասում ու հետեւում ենք գործի քննության ընթացքին»:
Աշոտ ՀԱԿՈԲՅԱՆ
