Հունիսի 11-12-ը ՀՀ վարչապետ Նիկոլ Փաշինյանը կլինի Բրյուսելում՝ հանդիպելու Եվրամիության ղեկավարությանը: Այս մասին այսօր լրագրողներին հայտնեց ՀՀ ԱԳՆ մամուլի խոսնակ Տիգրան Բալայանը: Լրագրողները հետաքրքրվեցին, թե արդյոք Հայաստանն ի դեմս վարչապետի մասնակցելու է նաեւ նույն օրերին կայանալիք ՆԱՏՕ-ի գագաթնաժողովին: Բալայանի փոխանցմամբ՝ ՆԱՏՕ-ի բուն գագաթնաժողովին Հայաստանը չի մասնակցելու, սակայն գագաթնաժողովին կից կայանալու է Աֆղանստանում խաղաղապահ առաքելություն իրականացնող երկրների ղեկավարների հանդիպում:
«Հայաստանը կարող է դրան մասնակցել որպես խաղաղապահ առաքելություն իրականացնող երկիր: Վարչապետի մասնակցելու կամ չմասնակցելու վերաբերյալ հավելյալ կտեղեկացնենք»,-նշեց ԱԳՆ մամուլի խոսնակը:
Նա խոսեց նաեւ օրերս Թուրքիայի նախագահի պաշտոնում վերընտրված Ռեջեփ Թայիփ Էրդողանին շնորհավորելու հավանականության մասին:
«Մինչեւ 2014թ.-ը ՀՀ-ի եւ Թուրքիայի միջեւ շնորհավորանքներ էին փոխանցվում խորհրդարանական մակարդակով: 2014թ.-ից՝ Էրդողանի նախագահ դառնալուց հետո, գործընթացը դադարել է»,-ընդգծեց Տիգրան Բալայանը:
Նա նաեւ նշեց. «Չեմ կարծում, որ կարելի է զարգացում ակնկալել հայ-թուրքական հարաբերություններում»:
Լուիզա ՍՈՒՔԻԱՍՅԱՆ
