Ադրբեջանի կողմից վերջերս Գերմանիայի հետ ռազմական գործակցություն սկսելու հայտարարությունը հունիսի 29-ին բարձրացվել է ՀՀ արտգործնախարար Զոհրաբ Մնացականյանի կողմից՝ Գերմանիայի իր պաշտոնակցի հետ հանդիպմանը: Այս մասին այսօր լրագրողների հետ զրույցում հայտնեց ՀՀ ԱԳՆ մամուլի խոսնակ Տիգրան Բալայանը: Նա նշեց, որ այլ մանրամասներ հաղորդել չի կարող, միայն ասաց. «Հարցը քննարկվել է, գերմանական կողմի պարզաբանումները մեզ բավարարում են»:
Ապա Տիգրան Բալայանը մեկնաբանեց ամերիկյան արտադրության ուղղաթիռների՝ վերջերս Ադրբեջանի զինված ուժերի տրամադրության ներքո հայտնվելու փաստը: Նա ընդգծեց, որ կատարվածը որոշ անձանց կողմից սոցցանցերում եւ քաղաքական դաշտում իրականությանը չհամապատասխանող հայտարարությունների առիթ է տալիս. «Իրականում մենք՝ ԱԳՆ-ն, շատ ավելի վաղ է զբաղվել խնդրով, քան այն հայտնվել է ԶԼՄ-ներում»:
Տիգրան Բալայանը հայտարարեց՝ պարզվել է, որ այդ ուղղաթիռները ամերիկյան արտադրության չեն, այլ մի քանի երկրներում օգտագործվում են ամերիկյան արտոնագրով. «Իսկ ուղղաթիռների գնման ընթացակարգը եղել է ոչ ռազմական նպատակներով»:
Հիշեցնենք՝ Razm.info կայքի փորձագետ Տարոն Հովհաննիսյան օրերս լրագրողներին հայտնել էր, որ ուղղաթիռները Ադրբեջանին կարող էին հասնել երրորդ երկրի միջոցով եւ արդիականացվել՝ օգտագործվելով ռազմական նպատակներով:
Լուիզա ՍՈՒՔԻԱՍՅԱՆ
