Հնդկաստանում նշվող Հոլլի գույների փառատոնը հասավ նաեւ Վանաձոր: Այսօր առաջին անգամ հանրապետության երրորդ քաղաքում նույնպես անցկացվեց փառատոնը: Հնդկաստանում փառատոնն ազդարարում է գարնան գալուստը, իսկ Հայաստանում այն նշում են տարվա տարբեր եղանակներին:
Վանաձորում փառատոնի կազմակերպիչը Arm Events-ն է: Ընկերությունը փառատոնը Հայաստանում առաջին անգամ կազմակերպել է 2016 թվականին, ապա հաջորդ տարի փորձել են դուրս գալ մայրաքաղաքի սահմաններից եւ այն իրականացնել նաեւ Ջերմուկում:
Իսկ այսօր՝ գունավոր տոնը հասավ Վանաձոր. «Քանի որ ամեն ինչ կենտրոնացված է Երեւանում, եւ մարզերի երիտասարդների վրա ուշադրությունն ավելի քիչ էր, որոշեցինք նման ֆորմատով ֆեստիվալ առաջինը մենք դուրս գալ: Ջերմուկից հետո մեզ արդեն գրում էին, թե ինչո՞ւ մյուս մարզերում էլ չի կազմակերպվում: Մենք էլ որոշեցինք այս տարի Վանաձորում անցկացնել միջոցառումը: Վանաձորում մեր սպասելիքներն արդարացան»,- ասաց Arm Events-ի հիմնադիր-տնօրեն Արթուրը:
Արթուրի խոսքով՝ միջոցառմանն այսօր Վանաձորում մասնակցել է ավելի քան 500 երիտասարդ: Նա նաեւ հույս հայտնեց, որ այստեղ եւս փառատոնը կդառնա ամենամյա:
Մանրամասները՝ տեսանյութում
Տաթեւիկ ՂԱԶԱՐՅԱՆ
