Այսօր դատախազության աշխատողի օրն է, ինչպես նաեւ ՀՀ դատախազության 100-ամյակը: Լրագրողների հետ զրույցում վարչապետ Նիկոլ Փաշինյանը հարցին՝ դուք կարծում եք, որ գլխավոր դատախազ Արթուր Դավթյանը պետք է շարունակի պաշտոնավարե՞լ՝ լինելով նախկին իշխանությունների ներկայացուցիչ, որի օրոք ապօրինի հարստացման մասով որեւէ քրգործ չի եղել՝ պատասխանեց. «Ես այդ հարցի վերաբերյալ չեմ կարող որեւէ կարծիք արտահայտել, որովհետեւ չեմ կարծում, թե նման իրավասություն ունեմ: Քաղաքական գնահատական տալու անհրաժեշտություն այս պահին չեմ տեսնում, որովհետեւ կարծում եմ, որ դատախազությունը եւ դատախազական համակարգը պետք է ունենան այդ հնարավորությունը՝ լիարժեք կատարելու իրենց գործառույթները:
Եթե էդ սկզբունքով առաջնորդվենք, դատախազության յուրաքանչյուր աշխատողի մասին կարելի է այդ նույն բանն ասել, ոչ միայն դատախազության, պետական համակարգի յուրաքանչյուր աշխատողի մասին կարելի է այդ բանն ասել: Ինչպես ես նախկինում ասել եմ, մեր գործողությունները չեն լինելու վենդետայի տրամաբանությամբ: Մեր խնդիրը հանրային համերաշխությունն ապահովելն է, եւ ես հույս ունեմ, որ դատախազությունը կգնա այդ ճանապարհով: Համենայնդեպս, ես քայլերը տեսնում եմ եւ հույս ունեմ, որ այդ քայլերը համոզիչ կլինեն թե՛ իրավունքի տեսակետից, թե օրենքի տեսակետից, թե օրենքի իշխանության եւ թե հանրային կարծիքի տեսակետից»:
Հռիփսիմե ՋԵԲԵՋՅԱՆ
