Այսօր ՀՀ դատախազության 100-ամյակն է եւ դատախազության աշխատողի օրը: Գլխավոր դատախազ Արթուր Դավթյանը լրագրողների հետ ճեպազրույցում հարցին՝ դուք միակն եք նախկին իշխանություններից, որ շարունակում եք այս ուժային կառույցում աշխատել, չե՞ք պատրաստվում հրաժարական տալ, ինչպես որոշ քաղաքացիներ են պահանջում՝ նա պատասխանեց, որ միակը չի եւ չի պատրաստվում հրաժարական տալ:
Հարցին՝ Սերժ Սարգսյանի օրոք նման բացահայտումներ երբեւէ տեղի չեն ունեցել, ինչ հիմա է տեղի ունենում, չե՞ք համարում, որ դա նաեւ ձեր թերացումն է, ձեր կառույցի թերացումն է՝ Արթուր Դավթյանը պատասխանեց. «Թերություններ կան բոլորիս աշխատանքում, եւ մենք ամեն օր մեր աշխատանքը ավելի կատարելագործելու, ավելի զարգացնելու անհրաժեշտություն ունենք: Անչափ կարեւոր է նկատել մեր թերությունները, մեր սխալները եւ դրանց ուղղման ուղղությամբ ձեռնարկել գործուն քայլեր: Դուք, կարծում եմ, ականատեսն եք դրա եւ դա խիստ շարունակական բովանդակություն է ունենալու»:
Հարցին՝ քաղաքական կա՞մքն էր պակասում, որ իրական բացահայտումներ արվեն՝ Արթուր Դավթյանը պատասխանեց. «Ես պարզաբանումներ տալու առիթ ունեցել եմ: Շատ ոգեւորված եմ գլխավոր դատախազի ու մեր հանրության խիստ պատրաստակամության եւ աջակցության համար: Դա շատ կարեւոր է: Ես նախկինում էլ էդ խոսքը միշտ ասել եմ, չգիտեմ որքանով եք դրան ուշադրություն դարձրել: Մեր աշխատանքի արդյունավետությունը մեծապես կախված է հանրային աջակցությունից»:
Թե հեղափոխությունն ինչ ազդեցություն է ունեցել դատախազության աշխատանքի վրա կամ ավելի կոնկրետ՝ հանրային հնչեղություն ունեցող դատական գործերում դատախազների դիրքորոշումը կալանքից ազատելու վերաբերյալ փոխվել է, մեծամասամբ չեն առարկում, ինչո՞ւ այդպես կտրուկ անցում եղավ՝ Արթուր Դավթյանն ի պատասխան կարծես սկսեց շեղել հեղափոխության հետ դա կապելուց՝ ասելով, որ իրենք երկար տարիներ խոսում էին կալանավորման պրակտիկայի խնդիրների մասին, երկար տարիներ տարբեր հարթակներում հիմնավորել են մեր օրենսդրության բացերով ու բոլորը սպասողական դա կապում էին նոր Քրեական դատավարության օրենսգրքի ընդունման հետ: Եվ հանրային պահանջի պայմաններում, երբ ակնառու դարձավ, որ այդտեղ փոփոխության կարիք կա, ավելի արագ քայլեր են արել:
Հարցին՝ դատախազությունը հրահանգ ստացե՞լ է նախկին աղմկահարույց գործերում, որտեղ ներգրաված են եղել պաշտոնատար անձինք ու կարճվել են կամ կասեցվել են, վերաբացել դրանք, եթե այո, կոնկրետ ո՞ր գործերին է դա վերաբերում՝ գլխավոր դատախազը պատասխանեց. «Ես այսօր, քանի որ մեր տոնն է, ինձ թույլ եմ տալիս քո հարցին հարցով պատասխանել՝ ինչո՞ւ դու ոչ մի դրական երանգով հարց չես տալիս»:
Հռիփսիմե ՋԵԲԵՋՅԱՆ
